Kryetari i Partisë Demokratike, Sali Berisha, ka reaguar ndaj deklaratave të kësaj të diele të kryeministrit Edi Rama, i cili u shpreh se protestat po ndikojnë negativisht në turizëm.
Përmes një videomesazhi të publikuar në rrjetet sociale, Berisha deklaroi se kjo lëvizje qytetare do të arrijë qëllimin e saj, që sipas tij është largimi i kreut të qeverisë.
“Ky revolucion, kjo protestë, kjo lëvizje nuk ka të ndalur. Do të realizojë plotësisht misionin e saj”, tha Berisha.
Berisha theksoi se pjesë e protestës janë edhe shqiptarë që nuk jetojnë më në vend, pasi sipas tij janë detyruar të largohen.
“Dje Tirana njohu protestën më të fuqishme në tërë ekzistencën e saj. Mbase 200 mijë qytetarë vërshuan në sheshet dhe rrugët e saj në kërkesën për dorëheqjen e Edi Ramës”, u shpreh Berisha.
Ndërkohë, thirrjet e protestuesve, të cilët kërkojnë edhe ndëshkimin e tij, kreu i demokratëve i injoroi. Gjithashtu, ai i bëri thirrje kryeministrit Rama të marrë parasysh mesazhet e te rinjve duke shtuar se, sipas tij dorëheqja e kryeministrit është e vetmja mënyrë për të rritur numrin e turistëve në vend.
