Këngëtarja e njohur Olivia Rodrigo ka habitur fansat me një rrëfim të papritur për shëndetin e saj, teksa promovonte albumin e ri.
Gjatë një interviste në KISS FM, artistja zbuloi se ka humbje të konsiderueshme dëgjimi në veshin e majtë.
Ka shumë gjëra që nuk shkojnë me mua
-tha ajo me humor, përpara se të shtonte:
Në fakt, jam rreth 60% e shurdhër në veshin e majtë. Nëse do të uleshit në atë anë dhe do të më tregonit një sekret, nuk do ta kuptoja çfarë po thoni.
Më pas ajo bëri shaka duke treguar anën e djathtë të kokës:
Nëse doni të më tregoni një sekret, hajdeni nga kjo anë.
Deklarata e saj la të habitur moderatorët Tyler West dhe Chloe Burrows, me këtë të fundit që komentoi se ishte e pabesueshme që një këngëtare me karrierë kaq të suksesshme përballet me një problem të tillë dëgjimi.
Rrëfimi vjen në prag të publikimit të albumit të saj të tretë, “You Seem Pretty Sad For A Girl So In Love”, i cili publikohet më 12 qershor. Një nga këngët e reja mban titullin “What’s Wrong With Me?”, gjë që çoi edhe në pyetjen që nxiti zbulimin e saj.
Më herët këtë muaj, Rodrigo foli hapur edhe për jetën e saj sentimentale dhe mënyrën se si përjetimet personale kanë ndikuar në muzikën e re.
Artistja pranoi se ndarjet romantike, sado të dhimbshme, mund të shërbejnë si një mundësi për të reflektuar dhe për të ridrejtuar jetën.
Mendoj se një ndarje mund të jetë një mundësi e mrekullueshme për ta orientuar jetën në një drejtim që përputhet më shumë me atë që je në të vërtetë
-tha ajo.
Këngëtarja konfirmoi në prill ndarjen nga aktori Louis Partridge, ndërsa zbuloi se albumi i ri pasqyron për herë të parë përvojën e saj në një marrëdhënie më të pjekur.
Ishte hera ime e parë në një marrëdhënie të vërtetë si e rritur. Marrëdhëniet të vendosin përballë vetes dhe të tregojnë anë të karakterit që ndoshta nuk i kishe parë më parë
-u shpreh ajo.
Rodrigo shtoi se me kalimin e viteve ka mësuar t’i përjetojë më lehtë zhgënjimet dhe refuzimet.
Dhimbja e zemrës që përjetova kur isha 17 vjeç ishte ndoshta më e vështira e jetës sime. Sot i marr gjërat më pak personalisht dhe kjo më ka ndihmuar të rritem
-përfundoi këngëtarja.
