Ministri në detyrë i Financave, Hekuran Murati, ka njoftuar se komisionet vlerësuese kanë nisur shqyrtimin e aplikimeve për dy masat e mbetura të Pakos për Përballje me Inflacionin 2.0, që kanë të bëjnë me mbështetjen për punëtorët e sektorit privat dhe studentët.
Sipas Muratit, komisioni përgjegjës për masën e sektorit privat është në fazën përfundimtare të shqyrtimit të aplikimeve, ndërsa pagesat për përfituesit pritet të ekzekutohen në fillim të javës së ardhshme, përkatësisht të hënën.
Ai ka bërë të ditur se procesi i verifikimit po vazhdon edhe për studentët që kanë aplikuar për mbështetje financiare. Sipas tij, komisioni do ta përfundojë punën pasi të pranojë konfirmimet e nevojshme nga institucionet e arsimit të lartë për statusin e aplikuesve.
Murati ka theksuar se qytetarët do të njoftohen me kohë sapo të finalizohen listat e përfituesve dhe të jenë gati për ekzekutimin e pagesave. Ai e ka mbyllur njoftimin me mesazhin: “Qeveria për të gjithë!”.
