Një studim i realizuar nga kompania Ipsos BVA, me porosi të Komisionit Kombëtar Francez për Mbrojtjen e të Dhënave (CNIL), ka zbuluar se pothuajse gjysma e të rinjve në Evropë përdorin chatbot-et e Inteligjencës Artificiale për të folur rreth problemeve personale dhe çështjeve intime. Sipas anketës, 51% e 3 800 pjesëmarrësve të moshës nga 11 deri në 25 vjeç deklaruan se e kanë më të lehtë të diskutojnë tema që lidhen me shëndetin mendor me një platformë dixhitale sesa me një profesionist të kujdesit shëndetësor.
Studimi tregon gjithashtu se 60% e të anketuarve i shohin chatbot-et e IA-së si një lloj “këshilltari për jetën”, duke sugjeruar se disponueshmëria e tyre gjatë gjithë kohës po plotëson boshllëqet e lëna nga format tradicionale të mbështetjes. Sipas revistës teknologjike “The Next Web”, këto platforma po fitojnë një rol gjithnjë e më të rëndësishëm në jetën e të rinjve, veçanërisht për shkak të aksesit të lehtë dhe komunikimit pa paragjykime.
Megjithatë, siç raporton Reuters, specialistët kanë ngritur shqetësime në lidhje me ndikimin që mund të kenë mjetet e Inteligjencës Artificiale te mirëqenia psikologjike e të rinjve. Ekspertët paralajmërojnë se këto sisteme kanë kufizime në identifikimin e emocioneve njerëzore dhe nuk mund të zëvendësojnë mbështetjen profesionale apo marrëdhëniet njerëzore në situata të ndjeshme. Në një ese të gjatë analitike për revistën The Atlantic, autori Tyler Austin Harper argumenton se zhvillimi i Inteligjencës Artificiale nuk po sjell vetëm transformime teknologjike dhe ekonomike, por po hap edhe një debat të thellë moral mbi vetë natyrën e njeriut. Sipas tij, fjalori tradicional i politikave publike si “rregullim”, “rrezik”, “efikasitet” apo “inovacion” mund të mos jetë i mjaftueshëm për të përshkruar atë që po ndodh në nivel antropologjik dhe etik.
