Aktori i njohur Matt Damon ka zbuluar një detaj interesant nga fillimet e karrierës së tij, duke treguar se para xhirimeve të filmit The Rainmaker punoi si kamerier në Tennessee për të përvetësuar më mirë theksin vendas.
Gjatë një interviste për GQ, në kuadër të promovimit të filmit të tij të ri “The Odyssey”, 55-vjeçari tregoi se kaloi rreth një muaj duke shërbyer pije në një lokal në Knoxville.
Punova si kamerier në Knoxville, Tennessee, për të mësuar theksin dhe e bëra këtë për rreth një muaj
-rrëfeu ai.
Damon e përshkroi rolin në filmin e regjisorit legjendar Francis Ford Coppola si një mundësi të jashtëzakonshme në karrierën e tij të hershme.
Duke folur përkrah aktorëve Robert Pattinson dhe Tom Holland, ai tregoi se vendosi të zhvendosej përkohësisht në Tennessee për t’u zhytur plotësisht në ambientin dhe mënyrën e të folurit të zonës.
Thjesht i shpjegova menaxheres se çfarë po përpiqesha të bëja. Ishte si të isha një kamerier shtesë pa pagesë. Mendova se do t’ua lija bakshishet kolegëve, por më duhej vetëm të isha aty. Kur u shërben njerëzve pije, ata flasin me ty dhe kjo më ndihmoi shumë
-kujtoi aktori.
Në film, Damon interpreton personazhin e Rudy Baylor, një i diplomuar i ri në drejtësi që përpiqet të ndërtojë karrierën e tij si avokat. Historia ndjek përballjen e tij me një kompani të fuqishme sigurimesh, duke e kthyer personazhin në qendër të një beteje të madhe ligjore.
Rrëfimi i Damon tregon edhe një herë përkushtimin e aktorëve të Hollivudit për t’u përgatitur në mënyrë sa më autentike për rolet e tyre, madje duke punuar në profesione krejtësisht të zakonshme për të hyrë në karakter.
