Edhe pas vdekjes, Michael Jackson vazhdon të shkruajë histori në industrinë muzikore.
“Mbreti i Popit” është bërë artisti i parë dhe i vetëm që ka arritur të renditet në listën prestigjioze Billboard Hot 100 në çdo dekadë që nga vitet 1970, duke vendosur një rekord të paprecedentë në muzikën moderne.
Jackson ka qenë pjesë e toplistës gjatë gjashtë dekadave të ndryshme: me 11 këngë në vitet ’70, 20 në vitet ’80, 12 në vitet ’90, katër në vitet 2000, katër në vitet 2010 dhe tashmë edhe në vitet 2020.
Arritja e tij më e fundit vjen falë këngës “Chicago”, e cila debutoi këtë javë në vendin e 30-të të Billboard Hot 100. Kënga ishte publikuar fillimisht në albumin pas vdekjes “Xscape”, i lançuar në vitin 2014, pesë vite pas ndarjes nga jeta të artistit.
“Chicago” i bashkohet këngëve të tjera të suksesshme nga i njëjti album, si “Love Never Felt So Good” me Justin Timberlake dhe “Slave to the Rhythm”.
Rikthimi i këngës në toplista është nxitur kryesisht nga rrjetet sociale, veçanërisht TikTok, ku një brez i ri dëgjuesish ka zbuluar muzikën e Jackson. Sipas të dhënave të fundit, kënga regjistroi mbi 10.7 milionë transmetime në SHBA brenda një jave, duke shënuar një rritje të ndjeshme krahasuar me javët e mëparshme.
Ky është gjithashtu rikthimi i parë i Michael Jackson në Billboard Hot 100 që nga viti 2018, kur ai u rendit me këngën Don’t Matter to Me së bashku me Drake.
Interesi i madh për katalogun muzikor të Jackson është rritur edhe më shumë pas suksesit të filmit të tij biografik, ndërsa disa nga hitet e tij më ikonike vazhdojnë të dominojnë platformat muzikore. Në renditjen më të fundit të Billboard Hot 100, krahas “Chicago”, figurojnë edhe klasikët “Billie Jean”, “Human Nature” dhe “Don’t Stop ‘Til You Get Enough”.
Me këtë rekord historik, Michael Jackson dëshmon edhe një herë se ndikimi i tij në muzikë mbetet i pakrahasueshëm, duke vazhduar të frymëzojë dhe të pushtojë toplistat dekada pas largimit të tij.
