Ngjyra e bardhë vazhdon të mbetet një nga trendet më elegante dhe të preferuara të këtij sezoni veror. E pastër, minimaliste dhe shumë e lehtë për t’u kombinuar, e bardha është zgjedhja ideale për vajzat që duan një pamje klasike, por njëkohësisht moderne. Nëse jeni duke kërkuar frymëzim për manikyrin tuaj të radhës, këto modele me të bardhë mund të jenë zgjedhja perfekte.
Modeli më klasik mbetet padyshim “e bardha e thjeshtë”. Thonjtë totalisht të bardhë, me ose pa shkëlqim, krijojnë një pamje shumë elegante dhe të pastër. Ky stil përshtatet me çdo veshje dhe është ideal si për pushime në plazh ashtu edhe për evente më formale. Minimalizmi i këtij modeli është pikërisht arsyeja pse ai mbetet gjithmonë në trend.
Një tjetër model që vazhdon të dominojë është “French” me të bardhë. Ky stil ikonë nuk del kurrë nga moda dhe vazhdon të jetë një nga zgjedhjet më të kërkuara në sallonet e bukurisë. I sofistikuar dhe shumë feminin, french-i klasik i bardhë i jep duarve një pamje të kuruar dhe elegante pa u dukur i ekzagjeruar.
Për vajzat që duan të eksperimentojnë pak më shumë, trendi i këtij sezoni është e bardha me detaje artistike. Një lule e vogël, një flutur apo gurë dekorativë në një prej thonjve mund ta bëjnë manikyrin të duket unik dhe shumë modern. Ky kombinim është perfekt për ato që duan të ruajnë elegancën e së bardhës, por njëkohësisht të shtojnë pak kreativitet. Ekspertët e bukurisë thonë se thonjtë e bardhë janë zgjedhja ideale për verën, pasi japin ndjesinë e freskisë dhe nxjerrin në pah nxirjen e lëkurës.
