Shtëpia e Bardhë tha sot se nuk do të jepte detaje mbi bisedimet diplomatike private, duke iu referuar propozimit të ri të Iranit drejtuar Shteteve të Bashkuara, i cili iu dorëzua ndërmjetësve pakistanezë.
Në të njëjtën kohë, ajo këmbëngul se Irani “nuk mund të ketë kurrë një armë bërthamore”.
“Ne nuk japim detaje mbi bisedimet diplomatike private”, tha zëdhënësja e Shtëpisë së Bardhë, Anna Kelly, për Reuters. “Presidenti Trump e ka bërë të qartë se Irani nuk mund të ketë kurrë një armë bërthamore dhe negociatat janë duke vazhduar për të siguruar sigurinë kombëtare afatshkurtër dhe afatgjatë të Shteteve të Bashkuara”, shtoi ajo.
Përveç kësaj, Departamenti i Thesarit i SHBA-së paralajmëroi sot se çdo kompani transporti detar që i paguan Iranit për kalimin e sigurt të anijeve të tyre përmes Ngushticës së Hormuzit, madje edhe përmes donacioneve bamirëse për organizata të tilla si Shoqata e Gjysmëhënës së Kuqe Iraniane, rrezikon masa ndëshkuese.
Teherani ka propozuar që anijet që kalojnë nëpër Ngushticë të paguajnë para, si pjesë e propozimeve për t’i dhënë fund luftës SHBA-Izrael kundër Iranit.
Deklarata nga Zyra e Kontrollit të Aseteve të Huaja (OFAC), e cila është pjesë e Departamentit të Thesarit të SHBA-së dhe është përgjegjëse për administrimin e sanksioneve ekonomike, theksoi se Shtetet e Bashkuara janë të vetëdijshme për kërcënimet iraniane ndaj transportit detar dhe kërkesat për pagesa për kalim të sigurt përmes Ngushticës së Hormuzit.
Teherani i ka dorëzuar ndërmjetësve pakistanezë një “propozim të ri negociues” të drejtuar Shteteve të Bashkuara, në kuadër të përpjekjeve për një marrëveshje të mundshme që synon t’i japë fund konfliktit të vazhdueshëm në Lindjen e Mesme.
Lajmi raportohet nga media iraniane agjencia iraniane e lajmeve IRNA.
Dokumenti është dorëzuar mbrëmjen e djeshme, por deri tani nuk është bërë publike asnjë detaj mbi përmbajtjen e tij. Mediat iraniane konfirmojnë vetëm se “Teherani ka paraqitur një propozim të ri për negociata”, pa dhënë informacion shtesë mbi kushtet apo kërkesat e përfshira.
Roli i Pakistanit si ndërmjetës në këtë proces mbetet gjithashtu i paqartë, ndërsa nuk ka ende një reagim zyrtar nga Uashingtoni lidhur me zhvillimin e fundit diplomatik.
