Një zhvillim i ri ka rikthyer vëmendjen te rasti i shumëpërfolur i vdekjes së Jeffrey Epstein, duke ngritur sërish pikëpyetje mbi momentet e fundit të tij në burg.
Sipas raportimit të The New York Times, një shënim i dyshuar vetëvrasjeje, që besohet se i përket Epstein, ka qëndruar i fshehur për afro shtatë vite në dosjet e një gjykate federale në Nju Jork.
Dokumenti thuhet se u gjet fillimisht në korrik të vitit 2019 nga ish-shoku i tij i qelisë. Ky i fundit ka deklaruar se e zbuloi shënimin pasi Epstein ishte gjetur pa ndjenja, me një copë pëlhure të lidhur rreth qafës. Ai incident nuk rezultoi fatal, por disa javë më pas Epstein u gjet i pajetë në qelinë e tij.
Sipas dëshmisë së bërë publike, në shënim shkruhej:
Është koha të themi lamtumirë.
Raportohet se dokumenti u vulos nga një gjyqtar federal si pjesë e një procesi penal ndaj ish-shokut të qelisë, çka bëri që hetuesit që merreshin me vdekjen e Epstein të mos kishin qasje në të.
“The New York Times” ka kërkuar tashmë zyrtarisht hapjen e dokumentit për publikun. Ndërkohë, edhe pse Departamenti Amerikan i Drejtësisë ka publikuar miliona faqe materiale lidhur me çështjen që nga fundi i vitit 2025, ky shënim nuk është përfshirë në asnjë prej tyre.
Një zëdhënëse e Departamentit të Drejtësisë është shprehur se institucioni nuk kishte dijeni për ekzistencën e këtij materiali.
Zbulimi i mundshëm i këtij dokumenti pritet të ndezë sërish debatet rreth vdekjes së Epstein, një çështje që prej vitesh ka nxitur teori dhe dyshime në opinionin publik.
