Irani ka deklaruar se kontrolli mbi Ngushticën e Hormuzit është “rikthyer në gjendjen e mëparshme”, për shkak të mosmarrëveshjeve të vazhdueshme me Shtetet e Bashkuara lidhur me bllokadën detare ndaj porteve iraniane.
Në një deklaratë të publikuar nga media iraniane, komanda operative e ushtrisë iraniane “Khatam Al-Anbiya” e përshkroi bllokadën amerikane si “pirateri”, duke thënë: Për këtë arsye, kontrolli i Ngushticës së Hormuzit është rikthyer në gjendjen e mëparshme dhe kjo rrugë ujore strategjike është nën menaxhimin dhe kontrollin e rreptë të forcave të armatosura.
Sipas Teheranit, situata do të mbetet e tillë derisa SHBA të garantojë lirinë e plotë të lundrimit për anijet që nisen nga Irani dhe kthehen drejt tij.
Këto deklarata shtojnë paqartësinë mbi gjendjen në Ngushticën e Hormuzit, një nga rrugët më të rëndësishme të transportit të naftës në botë. Dje ishte njoftuar se Ngushtica ishte rihapur për lundrim, por presidenti amerikan Donald Trump tha se bllokada amerikane do të mbetet në fuqi derisa të arrihet një marrëveshje me Iranin, përfshirë edhe çështjen e programit bërthamor.
