Liam Payne-s i dashura, Kate Cassidy, ka treguar se është bërë së fundmi viktimë e një shakaje shumë të ashpër online.
Influencuesja amerikane 26-vjeçare zbuloi në Instagram se një person anonim i kishte dërguar një buqetë me lule në shtëpinë e saj, por surpriza rezultoi të ishte shumë më e hidhur nga sa priste.
Kate publikoi një video në rrjetet sociale ku shfaq momentin kur merr njoftimin për dërgimin e luleve. Fillimisht ajo dukej e emocionuar, pasi mendonte se ishte një gjest i këndshëm surprizë.
E dua shumë kur marr lule
-dëgjohet të thotë ajo në fillim të videos, ndërsa shkon drejt derës për të marrë buqetën.
Megjithatë, entuziazmi i saj u kthye shpejt në zhgënjim dhe zemërim pasi lexoi mesazhin që shoqëronte dhuratën. Në kartolinë shkruhej:
Gëzuar ditëlindjen para kohe! Botox-i dhe filtrat e TikTok po punojnë më shumë se të gjithë ne.
E tronditur nga përmbajtja e mesazhit, Kate reagoi menjëherë në video duke e hedhur buqetën në kosh.
Këto lule duhet të shkojnë direkt në plehra
-tha ajo, duke shtuar se ishte shumë e zemëruar dhe e lënduar nga ky gjest.
Po dridhem nga nervat. Kush shpenzon kohë dhe para vetëm për të lënduar dikë?
-u shpreh ajo, duke shtuar se është lodhur nga komentet dhe sulmet negative në internet.
Ngjarja vjen në një periudhë emocionale për Kate, e cila vazhdon të përballet me humbjen e partnerit të saj.
Ish-anëtari i One Direction, Liam Payne, ndërroi jetë në tetor të vitit 2024 në moshën 31-vjeçare, pasi ra nga ballkoni i një hoteli në Buenos Aires, Argjentinë.
Së fundmi, Kate kishte ndarë gjithashtu një postim emocional për Ditën e Shën Valentinit, ku publikoi një foto të tyre së bashku dhe shkroi:
Gëzuar Shën Valentinin mikut tim më të mirë nga larg.
Ajo ka folur disa herë publikisht për dhimbjen e humbjes dhe ka theksuar se, edhe nëse në të ardhmen do të krijojë një lidhje tjetër, gjithmonë do ta mbajë gjallë kujtimin e Liam Payne në jetën e saj.
