Debati për reformën e Kodit Zgjedhor në Maqedoninë e Veriut është rikthyer në fokusin politik, pasi përfaqësues të partive parlamentare shprehën qëndrime të ndryshme për nevojën e një ligji të ri zgjedhor dhe për mënyrën se si duhet të realizohen ndryshimet.
Deputetja e PLD-së, Monika Zajkova, në “Top Tema” në TV Telma deklaroi se vendit i duhet një Kod i ri Zgjedhor, duke vlerësuar se për vite me radhë është humbur kohë pa rezultate konkrete.
Sipas saj, fakti që për rreth një dekadë janë formuar vetëm grupe pune pa përparim real tregon se mungon vullneti për reforma të thella në sistemin zgjedhor.
“Kur për 10 vjet formohen vetëm grupe pune dhe nuk kemi asnjë hap përpara, atëherë është e qartë se bëhet fjalë për manipulim dhe mungesë dëshire për ndryshime thelbësore në Kodin Zgjedhor”, deklaroi Zajkova, përcjell PressOnline.al
Ajo theksoi se rekomandimet e OSBE dhe ODIHR mund të zbatohen relativisht lehtë, pasi janë përgatitur nga ekspertë ndërkombëtarë dhe nuk kërkojnë debate të gjata politike.
Zajkova vlerëson se debati duhet të përqendrohet në hartimin e një kodi tërësisht të ri zgjedhor, ku do të rregullohen të gjitha aspektet e procesit elektoral. Sipas saj, përveç financimit të reklamave politike me pagesë, duhet të rregullohen edhe format e tjera të financimit që përfitojnë partitë më të mëdha, siç janë qendrat analitike dhe mekanizma të ngjashëm.
Një tjetër element që ajo e konsideron të rëndësishëm është edhe futja e listave të hapura zgjedhore.
“Listat e hapura mund të sjellin ndryshime thelbësore në procesin zgjedhor dhe në balancën e forcave në parlament, por edhe të rrisin përgjegjësinë e drejtpërdrejtë të deputetëve ndaj qytetarëve”, theksoi Zajkova.
Nga ana tjetër, deputeti i VMRO-DPMNE, Ljupço Prenxhov, në të njëjtin debat u shpreh se nuk ekziston një model ideal zgjedhor dhe se edhe kodi zgjedhor nuk mund të jetë i përsosur.
Ai vlerësoi se është pozitive që tema e reformës zgjedhore diskutohet dy vite para zgjedhjeve parlamentare, pasi kjo krijon hapësirë për debat dhe për gjetjen e një zgjidhjeje të pranueshme.
Sipas Prenxhov, nëse ndryshimet në Kodin Zgjedhor janë më të vogla se një e treta e përmbajtjes aktuale, atëherë bëhet fjalë vetëm për ndryshime dhe plotësime të ligjit ekzistues. Por nëse ndryshimet janë më të mëdha, atëherë do të kërkohet miratimi i një kodi tërësisht të ri zgjedhor.
Debati për reformën zgjedhore në Maqedonia e Veriut pritet të vazhdojë edhe në periudhën në vijim, ndërsa partitë politike mbeten të ndara mes nevojës për një ligj të ri zgjedhor dhe përmirësimit të modelit aktual.(PressOnline.al)
