Harry Styles ka befasuar fansat me një set të ri fotografik ku shfaqet në super formë fizike, ndërsa ka folur hapur për izolimin që i ka sjellë fama ndër vite.
Këngëtari 32-vjeçar pozoi pa bluzë për kopertinën e revistës Runner’s World, duke treguar trupin e tonifikuar dhe tatuazhet e shumta, fryt i përkushtimit të tij ndaj vrapimit.
Në fotot mbresëlënëse, ai shihet duke vrapuar në një rrugë malore të boshatisur, i veshur vetëm me atlete dhe pantallona të shkurtra sportive.
Pasioni i ri për vrapimin lindi pas përfundimit të turneut të tij “Love On Tour” në korrik 2023. Gjatë vitit të kaluar, Styles mori pjesë në dy maratona, përfshirë Maratonën e Tokios, ku përfundoi garën me kohën 3:24:07, dhe më pas arriti një rekord personal në Maratonën e Berlinit, duke e mbyllur në 2:59:13.
Në intervistën shoqëruese, ai bisedoi me shkrimtarin japonez Haruki Murakami, autor i librit “What I Talk About When I Talk About Running”, që e frymëzoi të provonte maratonën. Styles tregoi se vrapimi është kthyer në një hapësirë intime ku ai mund të përpunojë mendimet dhe të shkëputet nga presioni i famës.
Pas 173 koncerteve vetëm në vitin 2023 dhe më shumë se tre vite nga publikimi i albumit “Harry’s House”, artisti vendosi të bëjë një pauzë.
Ai pranoi se fama e hershme me grupin One Direction dhe suksesi i mëvonshëm solo e kishin bërë të ndihej i izoluar.
Me kalimin e viteve, i thosha jo çdo ftese ditëlindje, udhëtime, evente. Fillova të pyes veten nëse isha vërtet i zënë apo thjesht ishte më e lehtë të thosha jo
-u shpreh ai.
Gjatë pushimit nga skena, Styles udhëtoi, mori pjesë në festivale si Glastonbury dhe përjetoi jetën si spektator. Pikërisht në këtë periudhë, vrapimi u bë forma e tij e meditimit.
Kur stërvitesh për një maratonë, je vetëm. Nisesh për vrap dhe tre orë më vonë kthehesh. Ka diçka hipnotike në këtë proces
-tha ai, duke e përshkruar si një mënyrë për të qenë sërish “vëzhgues” dhe jo “i vëzhguar”.
Sipas tij, një nga gjërat më të bukura të vrapimit është thjeshtësia:
Nuk të duhet asgjë, vetëm një palë këpucë.
Pas tre vitesh larg qendrës së vëmendjes, Styles është rikthyer fuqishëm. Albumi i tij i katërt, “Kiss All The Time, Disco Occasionally”, publikohet më 6 mars, ndërsa ai hapi edicionin e vitit 2026 të BRIT Awards me performancën live të këngës së re “Aperture”.
Artisti pritet të nisë edhe turneun “Together Together”, me 50 koncerte në mbarë botën, duke dëshmuar se rikthimi i tij nuk është thjesht muzikor, por edhe personal.
