Aktorja dhe producentja australiane Margot Robbie ka ndarë një episod të pazakontë nga fillimet e karrierës së saj në Hollivud, duke zbuluar se dhurata më e keqe që ka marrë ndonjëherë ishte një libër për humbjen e peshës, dhuruar nga një koleg mashkull.
Në një intervistë video për Complex, përkrah muzikantes Charli XCX, Robbie, 35 vjeç, tregoi se bëhet fjalë për librin “Pse gratë franceze nuk shëndoshen”, një udhëzues i stilit të jetesës i botuar në vitin 2007 nga Mireille Guiliano. Sipas saj, libri i ishte dhuruar shumë herët në karrierë dhe përmbante kryesisht këshilla për dobësim.
Shumë herët në karrierën time, një aktor më dha këtë libër… dhe unë mendova vetëm: ‘Uau, të mallkoftë, shoku’
-tha Robbie me nota humori.
Ajo shtoi se nuk e di më se ku ndodhet libri dhe as nuk mban mend kush ishte personi që ia kishte dhuruar.
Gjatë intervistës, aktorja ndau edhe një tjetër dhuratë të çuditshme që e kishte lënë pa fjalë: një kavanoz që përmbante hirin e nënës së një fansi, i bashkangjitur me një gjerdan.
Nuk dija fare çfarë të bëja me të
-pranoi ajo.
Robbie dhe Charli XCX diskutuan gjithashtu për ikonat e tyre të preferuara të Hollivudit, ku aktorja zgjodhi të ndjerin Montgomery Clift, ndërsa Charli XCX përmendi Jack Nicholson si figurën e saj të preferuar.
Aktualisht, Margot Robbie është e angazhuar në filmin “Wuthering Heights”, ku luan përkrah Jacob Elordi, Hong Chau, Shazad Latif, Alison Oliver, Martin Clunes dhe Ewan Mitchell. Filmi pritet të dalë në kinema më 13 shkurt dhe përfshin muzikë origjinale nga Charli XCX.
Intervista, sipas Robbie, ishte e mbushur me humor, rrëfime personale dhe kujtime interesante nga rrugëtimi i saj në industrinë e filmit.
