Tjetër ndeshje për gjyqtaren Emanuela Rusta. Këtë radhë në Tuente-Atletiko Madrid e cila është e vlefshme për “Uefa Women’s Champions League”.
UEFA i ka besuar një tjetër përballje interesante arbitres nga Elbasani, Emanuela Rusta, e cila këtë herë do të ketë mundësinë të arbitrojë në kompeticionin madhështor të Ligës së Kampioneve për femra.
LEXO EDHE: Hajdutët në shtëpinë e Alisha Lehmanit, futbollistja: Herën tjetër ju lutem pastrojeni!
Ndihmës të Rustës do të jenë po arbitre femra Mirjeta Salla po nga Elbasani dhe Ediena Kapxhiu nga Durrësi, ndërsa gjyqtare e katërt është caktuar Kejsi Tafili nga Tirana.
Në sistemin VAR Kreshnik Barjamaj, në AVAR Albert Doda. Të dy nga Tirana.
Më herët arbitrja shqiptare Emanuela Rusta u caktua nga UEFA në ndeshjen Spanjë U-21 – San Marino U-21, e vlefshme për kualifikueset e Kampionatit Europian “Shqipëri – Serbi 2027”.
Kjo ishte hera e parë që UEFA i besoi një arbitreje shqiptare drejtimin e një ndeshjeje të djemve në nivelin U-21, një moment historik për arbitrimin shqiptar dhe për vetë Emanuela Rustën.
Takimi u zhvillua në stadiumin “Angel Carro” në Spanjë, më 14 nëntor, ndërsa e gjithë trupa gjykuese ishte shqiptare. Ilir Tartaraj dhe Xhulio Mani asistentë të dytë dhe të tretë, ndërsa Andi Koçi mbajti detyrën e arbitrit të katërt.
Arbitrat shqiptarë po bëhen gjithnjë e më të pranishëm në ndeshjet europiane, dhe ky është një tjetër hap i rëndësishëm në afirmimin e arbitrimit shqiptar në arenën ndërkombëtare.
Për vite me radhë, Emanuela Rusta ka qenë një emër që ka sfiduar paragjykimet dhe kufijtë gjinorë në sport. Si e vetmja grua që ka gjykuar në nivelet më të larta të futbollit për meshkuj në Shqipëri, ajo ka fituar respektin e publikut dhe institucioneve ndërkombëtare.
