O Yeong-su, aktori i njohur korean që interpretoi Oh Il-nam në sezonin e parë të serialit hit të Netflix “Squid Game”, është shpallur i pafajshëm nga një gjykatë në Korenë e Jugut për akuzat e ngacmimit seksual. Ai ishte paditur për dy raste të supozuara të ngacmimit seksual në vitin 2017, ku thuhej se kishte përqafuar, mbajtur dorën dhe puthur në faqe një aktore femër. Aktori 81-vjeçar kishte mohuar akuzat, duke thënë se mbajti dorën e saj vetëm për ta udhëzuar rreth një liqeni dhe se kërkoi falje pasi viktima kërkoi të mos bënte problem, por kjo nuk do të thotë se pranonte akuzat.
Në mars të vitit 2024, Gjykata e Degës Seongnam të Qarkut Suwon e kishte shpallur fajtor dhe i kishte dhënë një dënim 8-mujor me kusht për dy vjet, si dhe 40 orë pjesëmarrje në një program trajtimi për dhunën seksuale. Aktori kishte apeluar vendimin. Vendimi i fundit i Gjykatës së Qarkut Suwon anuloi dënimin, duke vënë në dyshim saktësinë e kujtimit të viktimës dhe duke theksuar se O Yeong-su kishte marrë pjesë në klasat për dhunë seksuale. Gjykata tha se ekzistonte “mundësia që kujtimi i viktimës të ishte i shtrembëruar me kalimin e kohës” dhe se, kur ka dyshim, “i akuzuari duhet të përfitojë nga dyshimi”.
Viktima ka reaguar ndaj vendimit, duke thënë se ajo nuk e fshin të vërtetën ose dhimbjen që ka përjetuar dhe ka theksuar se do të vazhdojë të flasë për të drejtën deri në fund. Organizata për të drejtat e grave Womenlink kritikoi vendimin, duke e quajtur atë një mënyrë për të “fshehur dhunën seksuale në botën e teatrit”. O Yeong-su u bë i njohur ndërkombëtarisht pas rolit të tij në “Squid Game” dhe në vitin 2022 u bë aktori i parë korean që fitoi një Golden Globe. Polemikat rreth akuzave të ngacmimit seksual e detyroi gjithashtu të tërhiqej nga një film i ardhshëm në Korenë e Jugut.
