Pas shumë muajsh pritjeje dhe thashethemesh, është zyrtarizuar: filmi i shumëpritur “The Devil Wears Prada 2” do të mbërrijë në kinema më 1 maj 2026.
Lajmin e ka konfirmuar Disney, duke ndezur entuziazmin e fansave të kinemasë dhe botës së modës në mbarë globin.
Sipas njoftimit zyrtar, vazhdimi i filmit kult do të sjellë sërish në ekran Meryl Streep në rolin legjendar të Miranda Priestly, kryeredaktores së pamëshirshme të revistës “Runway”.
Në trailerin e shkurtër që është publikuar së fundmi, Streep rikthehet me sharmin dhe autoritetin që e bëri figurë ikonike të kinemasë moderne.
Filmi do të ribashkojë edhe disa nga aktorët më të dashur të pjesës së parë: Emily Blunt në rolin e asistentës ambicioze Emily dhe Stanley Tucci si Nigel, drejtori kreativ me humor therës dhe elegancë të pashoqe.
Ndërkohë, edhe pse nuk është konfirmuar ende nëse Anne Hathaway do të rikthehet si Andrea Sachs, burime pranë produksionit kanë lënë të kuptohet se historia do të lidhet drejtpërdrejt me zhvillimet e karrierës së saj në botën e medias dhe modës.
Me një kast të jashtëzakonshëm, një skenar të ri plot intriga dhe satirë ndaj industrisë së modës, “The Devil Wears Prada 2” pritet të jetë një nga premierat më të bujshme të vitit 2026, duke premtuar një rikthim të paharrueshëm në universin glamuroz që magjepsi publikun gati dy dekada më parë.
