Arsimi profesional është në fokus edhe të Konkursit të sivjetmë për regjistrim në shkollat e mesme për vitin akademik 2025/2026, të cilin e publikoi MASH.
Nga 27.600 vende të planifikuara për regjistrim në vitin e parë të arsimit të mesëm, 7.900 janë në dispozicion për gjimnaze, ndërsa rreth 18.000 për shkollat profesionale, nga të cilat 6.700 për arsimin e dyfishtë. Vendet tjera të lira në konkursin e shpallur janë për shkollat artistike dhe Gjimnazi i sportit.
Duke iu përgjigjur pyetjeve të gazetarëve, ministrja e arsimit dhe shkencës, Vesna Janevska sot kumtoi se numri i paraleleve të dyfishta në shkolla është rritur në përputhje me analizat e tregut të punës në komuna dhe varësisht se sa kompani janë të interesuara.
“Por, sigurisht që ai proces po përmirësohet dhe pres që ky vit të jetë në një nivel vërtet të kënaqshëm. Numri i kompanive po rritet gjithashtu, mbi 550 kompani tashmë janë të përfshira në mënyrë aktive, pasi të përfundojë konkursi do të shohim se sa të tjera do të përfshihen. Por, sipas informatave që marr, ka interes për paralelet e dyfishta”, deklaroi Janevska në një ngjarje në Fakultetin e Inxhinierisë Mekanike me rastin e dhurimit të pajisjeve laboratorike.Në dy vitet e fundit shkollore, shkollat profesionale ishin zgjedhja për dy të tretat e numrit të përgjithshëm të nxënësve të vitit të parë të regjistruar. Ky trend, sipas Janevskës, nuk do të ketë ndikim negativ në arsimin e mesëm.
Në dy vitet e fundit shkollore, shkollat profesionale ishin zgjedhja për dy të tretat e numrit të përgjithshëm të nxënësve të regjistruar në vitin e parë. Ky trend, sipas Janevskës, nuk do të ketë ndikim negativ në arsimin e mesëm.
“Nuk do të ketë asnjë efekt negativ, përkundrazi pres që e gjithë shoqëria të përshtatet me nevojat e vendit. Kemi një ikje truri dhe mungesë të fuqisë punëtore dhe ky është një problem që duhet zgjidhur. Sepse nësë do të kenë mundësi, përmes dy paraleleve të dyfishta, nxëbësit të qëndrojnë në punë në kompanitë, ata do të qëndrojnë edhe në vend. Me përfundimin e arsimit të mesëm profesional, ata mund të hyjnë menjëherë në tregun e punës ose të vazhdojnë shkollimin, ndërsa shkollimi në gjimnaz në përgjithësi u dedikohet atyre që tashmë e dinë se do të vazhdojnë shkollimin. Sepse tregu i punës kërkon më pak arsim të tillë të përgjithshëm sesa arsim profesional, tha Janevska.
Regjistrimi i nxënësve në arsimin e mesëm do të bëhet elektronik përmes linkut në sistemin e shërbimeve elektronike të MASH https://euslugi.mon.gov.mk/ me hyrje të veçantë për nxënësit e shkollave të mesme përmes llogarive të tyre të përdoruesve në schools.mk.
Do të ketë dy aplikime në periudhën e regjistrimit në qershor dhe një në periudhën e regjistrimit në gusht. Aplikimi i parë elektronik i nxënësve do të jetë nga ora 00:00 e datës 14 qershor 2025 deri në orën 23:59 të datës 17 qershor 2025. Dorëzimi i dokumentacionit të nevojshëm në shkolla do të bëhet në datat 18 dhe 19 qershor dhe renditja përfundimtare me rezultatet e regjistrimit dhe vendet e disponueshme do të publikohet nga çdo shkollë më 20 qershor 2025.
Aplikimi i dytë elektronik në afatin e qershorit do të jetë më 30 qershor 2025, dorëzimi i dokumenteve më 1 korrik dhe publikimi i renditjes përfundimtare dhe vendeve të lira më 2 korrik 2025.
Aplikimi në afatin e gushtit, sipas konkursit të publikuar, do të kryhet më 21 gusht 2025.
Në konkursin e publikuar janë theksuar kushtet për regjistrimin e nxënësve në vitin e parë, numrin minimal të pikëve të kërkuara për regjistrim, dokumentacionin e nevojshëm që nxënësve do t’u duhet të dorëzojnë në shkollën e mesme të përzgjedhur pas regjistrimit elektronik të suksesshëm, si dhe udhëzimet për zbatimin e konkursit.
