Mesatarisht, çdo qytetar i Maqedonisë pi një antibiotik në vit. Rreth 1,423,504 reçeta për antibiotikë janë lëshuar në vitin 2023, tregojnë statistikat në platformën e-shëndeti. Por numri është më i madh, OBSH paralajmëron se edhe 1/3 e qytetarëve të Maqedonisë marrin antibiotikë pa reçetën e mjekut, trend ky shumë i rrezikshëm në plan afatgjatë, shkruan PRESSonline.al
Përdorimi i tepërt i antibiotikëve po dëmton në mënyrë të rrezikshme efektivitetin e tyre dhe po rrit rezistencën që mund të jetë përgjegjëse për 10 milionë vdekje në vit në mbarë botën deri në vitin 2050, ka paralajmëruar OBSH.
Epidemiologu Dragan Danilovski thotë se 95% e të gjitha infeksioneve të frymëmarrjes shkaktohen nga viruset dhe se në rastin e infeksionit viral, përdorimi i antibiotikëve ka vetëm kundërefekt.
“Antibiotikët kundër viruseve nuk funksionojnë. Nëse nuk funksionon, ai antibiotik do të gjejë një viktimë në organizëm që do ta ketë në dorë, këto janë bakteret e mira të zorrëve që i komprometon, masakrohen, sidomos nëse përdoren më shpesh antibiotikë”, shpjegon doktor Danilovski, përcjell PRESSonline.al
Bakteret e zorrëve, shpjegon epidemiologu Danilovski, janë qendra nga e cila rregullohet sistemi imunitar.
– Cili do të jetë reagimi imunitar ndaj një infeksioni të caktuar viral varet nga shëndeti i tyre. Nëse keni kompromentuar qendrën, nëse e keni bërë këtë, keni dobësuar edhe sistemin imunitar.
Fakti që në këtë mënyrë krijohet rezistencë të baktereve ndaj disa antibiotikëve është shqetësues. Dhe Maqedonia është në krye të listës në Evropë për sa i përket gjetjes së të ashtuquajturve baktere rezistente.(PRESSonline.al)
