Arsenali ka marrë një fitore të rëndësishme në kampionat, duke mposhtur 1-0 Hull City-n në Emirates Stadium.
Heroi i takimit ishte kapiteni Martin Odegaard, i cili shënoi golin vendimtar në minutën e 72-të, duke i dhënë tri pikët skuadrës së Mikel Artetës.
Përballja nuk ishte aspak e lehtë për londinezët, të cilët hasën vështirësi për të gjetur hapësira përballë një Hull City-je që u paraqit me guxim dhe arriti t’i rezistonte për pjesën më të madhe të ndeshjes.
Arsenali pati vështirësi sidomos në pjesën e parë, ndërsa një episod i diskutueshëm me Kai Havertz shtoi tensionin në Emirates. Gjermanit iu anulua një penallti pasi, pas ndërhyrjes së VAR-it, u konstatua pozicion jashtë loje në aksionin paraprak.
Pas pushimit, Arteta ndërhyri me zëvendësime, duke aktivizuar mes të tjerëve Viktor Gyokeres, Mikel Merinon dhe Eberechi Eze, në kërkim të golit që do të zhbllokonte takimin.
Ai erdhi në minutën e 72-të. Një goditje e Noni Maduekes u ndal fillimisht nga portieri i Hull, por topi i kthyer përfundoi te Odegaard, i cili reagoi më shpejt se të gjithë dhe e dërgoi në rrjetë.
Ky ishte goli i pestë sezonal për mesfushorin norvegjez, i cili sezonin e kaluar u pengua ndjeshëm nga dëmtimet dhe nuk arriti të jepte kontributin e pritur. Këtë herë, kapiteni po tregon rëndësinë e tij në objektivin e Arsenalit për të mbrojtur titullin kampion.
Me këtë fitore, Arsenali shkon në pushimin e kombëtareve në krye të Premier League, duke konfirmuar ambiciet për të qëndruar mes pretendentëve kryesorë për titullin.
Ndërkohë, një rezultat zhgënjyes ka ardhur për Tottenhamin, që është mundur 1-0 nga Leeds United në transfertë. Golin e vetëm të takimit e realizoi Noah Okafor në minutën e 79-të, duke i dhënë vendasve një fitore të rëndësishme.
Leeds arriti të shfrytëzonte momentin e tij në pjesën e dytë, ndërsa Tottenham nuk gjeti dot përgjigjen për të shmangur humbjen. Kështu, skuadra londineze ndërpret serinë pozitive dhe largohet pa pikë nga Elland Road.
Me këtë rezultat, Arsenali vazhdon garën në krye të Premier League, ndërsa Tottenham humbet terren në luftën për pozicionet e kreut.
