Dy tornado të fuqishme kanë goditur qytetin bregdetar të Marsalës, në Siçilinë perëndimore të Italisë, duke shkaktuar dëme të mëdha materiale dhe duke plagosur dhjetëra persona. Erërat e forta përmbysën automjete, dëmtuan ndërtesa dhe goditën edhe një shkollë ku ndodheshin 273 nxënës.
Sipas raportimeve të The Guardian, fenomeni ekstrem i motit shkaktoi skena kaotike, ndërsa pamjet e publikuara në rrjetet sociale tregojnë tornadot duke u formuar mbi det dhe duke iu afruar bregdetit.
Fuqia e erës shkaktoi dëme të konsiderueshme në banesa, ndërtesa dhe automjete. Xhamat e thyer dhe objektet e marra nga era plagosën disa persona, ndërsa ekipet e emergjencës ndërhynë për t’u ardhur në ndihmë të prekurve.
Sipas informacioneve paraprake, dhjetëra persona mbetën të plagosur nga kalimi i tornadove, ndërsa të paktën 11 prej tyre u dërguan në spital për të marrë trajtim mjekësor.
Mes të plagosurve më rëndë është një burrë 70-vjeçar, i cili u transportua në spitalin e Mazara del Vallo-s në gjendje kritike. Ai kishte pësuar disa fraktura si pasojë e motit ekstrem.
Pamjet nga Marsala tregojnë shkallën e dëmeve: makina të përmbysura, automjete të mbuluara nga balta dhe ndërtesa me fasada e dritare të dëmtuara.
Një nga momentet më shqetësuese ishte goditja e një shkolle në Marsala, ku në atë kohë ndodheshin 273 nxënës.
Gjashtë fëmijë pësuan lëndime të lehta, përfshirë prerje dhe gërvishtje. Fatmirësisht, të gjithë nxënësit u evakuuan në mënyrë të sigurt nga ndërtesa.
Pamjet e regjistruara me dron pas kalimit të tornados tregojnë dëme të konsiderueshme brenda ambienteve të shkollës. Dritaret ishin thyer, ndërsa tavolinat dhe karriget ishin përmbysur nga forca e erës.
Videot që qarkullojnë në rrjetet sociale tregojnë dy vorbulla të fuqishme që formohen mbi det dhe lëvizin drejt bregdetit, duke shkaktuar frikë te banorët.
