Ish-presidentja e Kosovës, Vjosa Osmani, ka folur për raportet e saj me kryetarin e Lëvizjes Vetëvendosje, Albin Kurti, duke thënë se pavarësisht bashkëpunimit të fundit, dallimet politike mes tyre vazhdojnë të jenë të pranishme.
Osmani tha se së fundmi kanë bashkëpunuar për të gjetur një kandidat të përshtatshëm për president të vendit, duke vlerësuar se ky proces dëshmoi se mund të punohet së bashku kur ekziston vullneti.
“Tani për tani, sikur ne e dimë shumë mirë që jemi opozita dhe ai është në qeveri. Por në të njëjtën kohë, kohët e fundit kemi punuar së bashku për të gjetur një president të përshtatshëm për këtë vend dhe ia dolëm. Pra, kjo është një gjë në të cilën arritëm të punonim së bashku, në një mënyrë të mirë”, tha Osmani në emisionin “Inside Albania” të Euronews Albania.
Megjithatë, ajo nënvizoi se bashkëpunimi në këtë çështje nuk nënkupton se dallimet politike janë zhdukur.
“Unë besoj fort gjithashtu në interesin dhe interesin afatgjatë të këtij vendi, por kjo nuk do të thotë që nuk kemi dallime në kaq shumë çështje të tjera. Ato dallime mbeten, dhe kjo është arsyeja pse kemi vendosur të qëndrojmë në opozitë”, u shpreh ajo.
Osmani foli edhe për situatën aktuale politike në Kosovë, duke paralajmëruar se pasiguria institucionale po i shkakton vendit dëme të mëdha.
“Në këtë pikë, është vërtet e pasigurt nëse do të kemi institucione apo jo, gjë që është për të ardhur keq. Për popullin e Kosovës, por edhe për interesat e Kosovës brenda vendit dhe ndërkombëtarisht, sepse dëmi është i jashtëzakonshëm. Në këtë pikë, duket sikur është gjithashtu i pariparueshëm”, deklaroi Osmani.
Duke folur për arsyet që, sipas saj, kanë çuar në ngërçin politik, ish-presidentja përmendi disa faktorë dhe solli si shembull ish-presidentin Ibrahim Rugova dhe mënyrën e tij të bashkëpunimit me subjektet e tjera politike.
“Pavarësisht dallimeve të mëdha që kishte me kundërshtarët e tij politikë, ai gjithmonë dinte të ngrihej mbi veten e tij, mbi politikën partiake dhe gjithmonë të vendoste interesat e vendit të parat”, tha Osmani.
Ajo kujtoi se dallimet politike pas luftës mes LDK-së dhe partive të tjera ishin shumë të mëdha, por sipas saj, Rugova kishte arritur të krijonte ura bashkëpunimi.
“Por ai dinte t’i afronte njerëzit me njëri-tjetrin për interesin e vendit”, shtoi ajo.
Osmani ishte kritike ndaj klasës politike aktuale, duke thënë se interesat personale, hakmarrja dhe egoja po ndikojnë në funksionimin e institucioneve.
“Pra, bëhet fjalë shumë për interesa personale, hakmarrje dhe ego. Po, shumë ego, kryesisht ego mashkullore, nëse mund ta shtoj, shumë ego”, deklaroi ajo.
Sipas Osmanit, një tjetër problem është mungesa e gatishmërisë për bashkëpunim politik dhe krijimin e koalicioneve në funksion të interesit të vendit.
“Dhe pastaj mungesa e gatishmërisë nga partia e parë për të kuptuar thjesht se bashkëpunimi, koalicionet, puna së bashku janë në interesin më të mirë të vendit, në të njëjtën mënyrë që e kuptonte Presidenti Rugova. Nëse do ta bënin këtë, do të ishte gjithashtu në të mirën e tyre”, tha ajo.
Osmani përfundoi duke e cilësuar si të keqardhshme mungesën e mirëkuptimit politik për bashkëpunim.
“Por kjo mungesë mirëkuptimi nga ana e tyre është shumë për të ardhur keq”, shtoi Osmani.
