Miqtë dhe bashkëpunëtorët e afërt të Tim Curry kanë ndarë detaje të dhimbshme për vitet e fundit të jetës së aktorit, duke treguar se problemet shëndetësore pas goditjes në tru kishin ndikuar ndjeshëm në cilësinë e jetës së tij.
Curry ndërroi jetë në shtëpinë e tij në Los Angeles, në moshën 80-vjeçare, ndërsa lajmi u konfirmua nga përfaqësuesi i tij për “Variety”.
Aktori pësoi një goditje në tru në vitin 2012, e cila e la pjesërisht të paralizuar. Pas kësaj, ai u tërhoq gradualisht nga jeta publike dhe bëri shumë më pak paraqitje, megjithëse vazhdoi herë pas here të punonte si aktor zëri dhe të merrte pjesë në projekte filmike.
Një person pranë aktorit tha se Curry kishte qenë gjithmonë jashtëzakonisht energjik dhe i talentuar, ndaj humbja e shumë prej aftësive që kishte para goditjes ishte veçanërisht e vështirë për të.
Edhe Scott Stander, producent i “The Rocky Horror Picture Show”, ku Curry interpretoi rolin ikonik të Dr. Frank-N-Furter, foli për kufizimet me të cilat aktori u përball për më shumë se një dekadë.
Sipas tij, Curry nuk mund të bënte më gjërat që kishte dashur gjatë gjithë jetës: të vraponte, të kërcente në skenë, të interpretonte muzikalë apo të këndonte. Megjithatë, Stander theksoi se trashëgimia e tij artistike do të mbetet përgjithmonë.
Miqtë e aktorit treguan gjithashtu se Curry nuk kishte frikë nga vdekja dhe se ishte mirënjohës për jetën që kishte pasur. Në të njëjtën kohë, ata e kuptonin se sa shumë e kishte ndryshuar goditja në tru jetën e tij.
Në një paraqitje të rrallë në tetor, gjatë një eventi për 50-vjetorin e “The Rocky Horror Picture Show” në Muzeun e Akademisë në Los Angeles, Curry kishte folur vetë për gjendjen e tij.
Ai tregoi se ende nuk mund të ecte dhe se kishte probleme serioze me këmbën e majtë, gjë që e kufizonte ndjeshëm dhe e bënte të pamundur që të këndonte apo të kërcente si më parë.
Pavarësisht këtyre vështirësive, regjisori Michael Leavy, i cili punoi me Curry në filmin “Stream” dhe në vazhdimin e tij, e kujtoi atë për personalitetin që kishte ruajtur edhe pas goditjes në tru.
Sipas Leavy-t, Curry vazhdoi të kishte humorin, inteligjencën, ngrohtësinë dhe sharmin që e kishin bërë një figurë kaq të veçantë.
Shkaku i vdekjes së aktorit nuk është bërë ende i ditur. Megjithatë, për njerëzit që e njihnin nga afër, vitet e fundit të tij ishin të shënuara nga pasojat e një goditjeje që ndryshoi përgjithmonë jetën e një prej artistëve më ikonë të skenës dhe ekranit.
