Ushtria e Shteteve të Bashkuara bëri të ditur sot se ka kryer sulme kundër objektivave ushtarake iraniane pranë Ngushticës së Hormuzit, ndërsa shpërthime të fuqishme u dëgjuan në qytetin port të Bandar Abbasit dhe ishujt përreth.
Sulmet shënojnë një përshkallëzim të ashpër të armiqësive mes Ëashingtonit dhe Teheranit, teksa tensionet rajonale janë rritur ndjeshëm pas shkëmbimit të goditjeve gjatë fundjavës.
Guvernatori i Qeshmit, Hossein Amir Teymouri, tha se 10 deri në 11 raketa goditën ishullin e Qeshmit në Ngushticën e Hormuzit, duke shënjestruar instalime ushtarake.
Ai i tha agjencisë shtetërore IRNA se në sulmet fillestare nuk u raportuan viktima.Agjencia Mehr News, duke u thirrur në burime lokale, raportoi se dy raketa goditën edhe ishullin Abu Musa pranë hyrjes së rrugës strategjike detare. Banorët e fshatit Mesen thanë se dëgjuan shpërthime të shumta.
Ushtria amerikane tha se kreu sulme ndaj objektivave ushtarake iraniane pranë Ngushticës së Hormuzit të dielën, sipas Axios.
Operacioni i Uashingtonit erdhi pasi Irani sulmoi vende ushtarake amerikane në Kuvajt, Bahrein, Katar, Jordani dhe Oman herët të dielën, duke pretenduar se ishin hakmarrje për sulmet e mëparshme amerikane ndaj Iranit.
Komanda Qendrore e SHBA-së kishte goditur rreth 140 objektiva në Iran pas një sulmi iranian ndaj një anijeje tregtare në këtë rrugë ujore strategjike.
Autoritetet lokale në provincën jugore Hormozgan njoftuan se një zyrtar telekomunikacioni u vra dhe dy të tjerë u plagosën teksa punonin për të rivendosur linjat e komunikimit pas sulmeve.
Agjencia Fars News raportoi se u dëgjuan disa shpërthime në lindje të Bandar Abbasit dhe në ujërat pranë ishullit Qeshm. Sulmet kanë ngritur frikën për një përhapje më të gjerë të konfliktit rajonal, teksa tensionet mes dy fuqive vazhdojnë të përshkallëzohen.
