Shfuqizimi i vendimit të vitit 2007 nga Gjykata Kushtetuese për emrat e rrugëve të Tetovës, ngriti sërish në këmbë opozitën shqiptare! Me një marsh të dytë protestues, Bashkimi Demokratik për Integrim marshoi mbrëmë nga sheshi i qytetit deri te ndërtesa e Komunës së Tetovës.
Integristët kërkojnë dorëheqjen e kryetarit, Bilall Kasami, si dhe riemërimin e menjëhershëm të emrave të shfuqizuar. Kryetari i degës së BDI-së në Tetovë, Bajram Rexhepi, tha se kishin pritur që edhe kreu i komunës të ishte pjesë e kësaj proteste.
Nga ana tjetër, duke shpërndarë një fotografi ku shihej një numër i vogël protestuesish, deputeti i koalicionit VLEN, Adnan Azizi, reagoi në formë ironike duke falënderuar Tetovën për mospjesëmarrje në protestë.
Në Facebook shkroi: “Faleminderit, Tetovë! Gjithmonë je me BESE. Kjo besë na jep forcë, na mban të bashkuar dhe na obligon të ecim përpara me përkushtim, dinjitet e përgjegjësi.”
I pyetur nëse BDI-ja është e gatshme për zgjedhje të reja për Këshillin Komunal, Rexhepi u përgjigj se, paralelisht me këshillin, dorëheqje duhet të japë edhe Kasami.
Nesër në orën 10:00 pritet të mbahet seanca e 15-të e Këshillit Komunal të Tetovës. Në rend dite është propozimi i këshilltarëve të BDI-së për miratimin e 67 emrave të rinj, ku bëjnë pjesë edhe ata që u shfuqizuan nga Gjykata Kushtetuese. Sipas juristit Mersim Maksuti, nëse këshilli komunal voton sërish të njëjtët emra, atëherë Këshilli i Tetovës shpërbëhet automatikisht dhe komuna shkon në zgjedhje të reja për këshilltarë.
