Eliminimi i dhimbshëm i Brazilit nga Kupa e Botës 2026 ka rikthyer një nga teoritë më të pazakonta që qarkullojnë prej vitesh në internetin e futbollit: të ashtuquajturin “Mallkimi i Maces”. Pesë herë kampionët e botës u eliminuan në fazën e 1/8-ave pas humbjes 2-1 ndaj Norvegjisë, duke zgjatur edhe më shumë pritjen për trofeun e gjashtë të Botërorit. Pas vërshëllimës së fundit, kamerat kapën Neymarin të përlotur në fushë, ndërsa tifozët në rrjetet sociale rikthyen menjëherë një episod të çuditshëm nga Botërori i Katarit në vitin 2022.
Ngjarja që nisi gjithçka ndodhi gjatë një konference për shtyp të Brazilit në dhjetor 2022, ku protagonist ishte një mace endacake. Gjatë konferencës ku merrte pjesë Vinícius Jr., një mace u ngjit papritur mbi tavolinë përballë gazetarëve. Në vend që të largohej me qetësi, një pjesëtar i stafit të Brazilit e mori kafshën dhe e largoi me forcë nga tavolina.
Kliko këtu për të parë videon!
Momenti u bë menjëherë viral në internet. Fillimisht u shndërrua në material humori, por shumë përdorues kritikuan mënyrën se si u trajtua macja, duke e cilësuar veprimin si të panevojshëm. Në shumë kultura, macet kanë edhe një simbolikë të veçantë dhe kjo e bëri episodin edhe më të komentuar.
Pak ditë më vonë, Brazili u eliminua në mënyrë dramatike nga Kroacia në çerekfinalet e Botërorit 2022, pavarësisht se konsiderohej një nga favoritët kryesorë për fitimin e trofeut.
Që nga ai moment, në rrjetet sociale nisi të përhapej me shaka, por edhe me një dozë besimi nga disa tifozë, teoria se incidenti me macen kishte sjellë një “mallkim” mbi kombëtaren braziliane.
Tashmë, pas një tjetër dështimi në Kupën e Botës 2026, kjo teori është rikthyer fuqishëm. Tifozët kanë mbushur rrjetet sociale me postime dhe meme duke pretenduar se Brazili ende po “paguaka” për atë moment të diskutueshëm me macen.
Edhe pse bëhet fjalë vetëm për një teori interneti pa asnjë bazë reale, “Mallkimi i Maces” është kthyer në një nga historitë më të famshme dhe më të çuditshme që kanë shoqëruar kombëtaren braziliane në vitet e fundit.
