Kryetari i Qeverisë, Hristijan Mickoski, sot në seancën e Kuvendit, duke iu përgjigjur pyetjes së deputetit dhe kryetarit të opozitës, Venko Filipçe, tha se arsyeja pse qytetarët planifikojnë ta braktisin Maqedoninë nuk është mungesa e perspektivës, por mosbesimi në drejtësi dhe në institucione. Sipas tij, qytetarët e shohin pikërisht Filipçen dhe ish-funksionarët e LSDM-së duke u kënaqur me këngët e Haris Xhinoviqit në Dubai dhe në jahte, në vend që të jenë pas grilave dhe të japin përgjegjësi, përcjell PressOnline.al.
“Thoni se çdo i treti qytetar planifikon ta braktisë Maqedoninë, por a e dini pse? Sepse ju shohin juve në Dubai duke u kënaqur me këngët e Haris Xhinoviqit, ndërsa nuk jeni në burg. Sepse shohin atje ish-funksionarë duke u kënaqur në jahte, ndërsa nuk janë në burg dhe nuk japin përgjigje se pse janë atje. Prandaj njerëzit janë të zhgënjyer. Kur t’ju shohin duke buzëqeshur pas grilave, atëherë do të jenë të lumtur dhe të kënaqur, sepse drejtësia do të ketë ardhur”, tha Mickoski, duke shtuar:
“Dhe së fundmi, këtu do ta përfundoj. Unë e pranoj se jam fajtor që kanë kaluar dy vite, ndërsa ju ende kënaqeni në jahtet në Paljuri, në vend që të jeni diku tjetër. E pranoj se jam fajtor. Por, po ashtu, ju shoh në sy dhe ju premtoj se nuk do t’i zhgënjejmë më qytetarët maqedonas duke parë ish-funksionarë që kënaqen në jahte dhe nën tingujt e muzikës së Haris Xhinoviqit. Ja, kjo është dëshira e popullit”, tha Mickoski. (PressOnline.al)
