Janë pranuar shtatë amendamente nga gjithsej 105 të paraqitura gjatë debatit në Komisionin Parlamentar për Sistem Politik dhe Marrëdhënie Ndërmjet Bashkësive, i cili u mbajt pasditen e sotme për Propozim-ligjin për shërbimin gjyqësor, në lexim të dytë. Kryetari i Komisionit, Lupço Prendxhov, shpalli një pauzë dhe njoftoi se do të dorëzohen edhe amendamente të Komisionit, përcjell PressOnline.al.
Amendamentet e paraqitura nga opozita, përkatësisht LSDM-ja me koalicionin, Fronti Evropian dhe Levica, kishin të bënin me përmirësimin e pozitës materiale dhe profesionale të shërbyesve gjyqësorë përmes futjes së shtesave në pagë për rrezikshmëri të lartë dhe konfidencialitet, punë jashtë orarit, mbajtjen e kuadrit profesional, si dhe të drejtën për kompensime dhe shpërblime jubilare.
Po ashtu, ato parashihnin fshirjen e disa formulimeve në nenet që ndryshojnë kompetencën për miratimin e rregullores për zbatimin e procedurës së avancimit në detyrë. Në vend që kjo kompetencë t’i takojë ministrit të Drejtësisë, propozohej që ajo t’i kalojë Këshillit të Shërbimit Gjyqësor, me qëllim sigurimin e autonomisë institucionale në procedurat e avancimit të punonjësve të shërbimit gjyqësor.
Amendamentet përfshinin gjithashtu heqjen e detyrimit që gjykatat t’i dorëzojnë të dhënat për të punësuarit Ministrisë së Administratës Publike dhe Këshillit të Buxhetit Gjyqësor lidhur me Regjistrin e të Punësuarve në Sektorin Publik. Gjithashtu propozohej vendosja e një sistemi më të favorshëm pensionimi për shërbyesit gjyqësorë të kategorisë G, me stazh të shtuar, mundësi për pensionim të parakohshëm me kushte të caktuara dhe me 80 për qind të bazës së pensionit, si dhe detyrimi që shpenzimet deri në arritjen e pensionit të pleqërisë të mbulohen nga gjykata.
Ministri i Drejtësisë, Igor Fillkov, për një pjesë të amendamenteve deklaroi se janë të papranueshme, pasi disa nene janë harmonizuar me mendimin e Ministrisë së Financave. Sipas tij, dispozitat për shtesat në pagë janë harmonizuar edhe me Ministrinë e Administratës Publike, ndërsa disa nga amendamentet e propozuara do të kishin pasoja shtesë fiskale për buxhetin e shtetit. Ai shtoi se çështjet e trajtuara tashmë janë rregulluar në mënyrë adekuate në tekstin e propozim-ligjit dhe nuk ka nevojë për ndërhyrje shtesë.
Zëvendësministri i Drejtësisë, Alen Dereban, në arsyetimin e tij theksoi se propozim-ligjet për shërbimin gjyqësor dhe atë të prokurorisë publike janë rezultat i një pune shumëvjeçare, i një procesi të gjerë dhe gjithëpërfshirës konsultativ, si dhe i harmonizimit me kornizën aktuale ligjore dhe prioritetet reformuese të shtetit. Ai bëri të ditur se grupi punues i kishte përgatitur tekstet e ligjeve një vit më parë, pas së cilës ato u publikuan në ENER për konsultim publik.
Sipas Derebanit, gjatë këtij procesi janë dorëzuar një numër i madh vërejtjesh dhe propozimesh nga institucionet relevante, komuniteti profesional dhe palët e interesuara, të cilat janë shqyrtuar me kujdes dhe janë përfshirë në tekstet përfundimtare të projektligjeve.
Sa i përket pagave, ai theksoi se një nga qëllimet kryesore të agjendës reformuese ishte përmirësimi i statusit material të shërbyesve gjyqësorë dhe të prokurorisë publike. Sipas tij, ky qëllim tashmë është realizuar përmes kontratave kolektive, ndërsa zgjidhjet e tyre janë inkorporuar edhe në dispozitat ligjore.
Me këto zgjidhje ligjore, sipas Ministrisë së Drejtësisë, përmbushen detyrimet që dalin nga Agjenda e Reformave dhe Strategjia Sektoriale e Zhvillimit për Gjyqësorin 2024–2028, forcohen kapacitetet e institucioneve të drejtësisë dhe krijohen parakushtet për një sistem gjyqësor më efikas, më të pavarur dhe më cilësor, në interes të qytetarëve. (PressOnline.al)
