Policia e Kosovës ka evakuuar qytetarët që ndodheshin brenda Stacionit të Autobusëve në Prishtinë, pas dyshimeve për një mjet të dyshuar shpërthyes.
Zëdhënësja e Policisë për rajonin e Prishtinës, Flora Ahmeti, ka bërë të ditur se informacioni për mjetin e dyshuar është pranuar rreth orës 18:00, me ç’rast njësitë policore kanë dalë menjëherë në vendin e ngjarjes dhe kanë ndërmarrë masat e nevojshme të sigurisë.
Aktualisht, zona mbetet e rrethuar ndërsa autoritetet kompetente po kryejnë verifikimet e nevojshme.
“Rreth orës 18:00, kemi pranuar një informatë për mjet shpërthyes në Stacionin e Autobusëve, në Prishtinë. Menjëherë policia ka ndërmarrë të gjitha masat e sigurisë në atë zonë. Në një perimetër të caktuar ka evakuuar qytetarët, ndërkohë që janë angazhuar njësitet përkatëse për trajtimin e informatës”, ka deklaruar Ahmeti per Portalin Dukagjini.
