Tom Hanks ka bërë një rrëfim të sinqertë për një nga filmat më të suksesshëm të karrierës së tij, duke pranuar se ekziston një skenë në “Cast Away” që ende sot e bën të ndihet në siklet.
Gjatë pjesëmarrjes në podkastin “The Rest is Entertainment”, aktori legjendar tregoi se gjithmonë e kishte të vështirë të shihte një moment të veçantë nga filmi i vitit 2000, pasi mendon se ka bërë një zgjedhje të gabuar në interpretim.
Bëhet fjalë për skenën prekëse kur personazhi i tij, Chuck Noland, rikthehet në shtëpi pas katër vitesh izolimi në një ishull të shkretë dhe i kthen Kelly-t, të luajtur nga Helen Hunt, orën që ajo i kishte dhuruar para udhëtimit fatal.
Hanks pranoi se sa herë filmi transmetohej në televizion, ai preferonte të largohej nga dhoma përpara se të niste ajo skenë.
Ka një moment në atë skenë që më ka shqetësuar gjithmonë. Sa herë që filmi shfaqej, ngrihesha dhe largohesha para se të vinte ai fragment
-rrëfeu aktori.
Sipas tij, problemi nuk ishte skena në vetvete, por një gjest i vogël që bëri gjatë interpretimit. Hanks shpjegoi se në atë çast nuk po vepronte si Chuck Noland, por si Tom Hanks, diçka që e kuptoi vetëm kur pa versionin përfundimtar të filmit.
E kuptova më vonë se ai reagim nuk i përkiste personazhit. Ishte diçka që do ta bëja unë, jo Chuck-u
-tha ai.
“Cast Away” u shndërrua në një nga filmat më të vlerësuar të vitit 2000 dhe i solli Hanks një nominim për Oscar në kategorinë e Aktorit më të Mirë. Megjithatë, çmimi atë vit iu dha Russell Crowe për interpretimin në “Gladiator”.
Pavarësisht suksesit të madh dhe vlerësimeve që mori filmi, duket se për Tom Hanks ekziston ende një moment që ai do të kishte dashur ta luante ndryshe.
