Pas një karriere që ka lënë gjurmë në sport dhe kulturën pop, David Beckham do të nderohet me një yll në Hollywood Walk of Fame, një nga vlerësimet më prestigjioze në botën e argëtimit.
Ish-kapiteni i Anglisë do të marrë zyrtarisht yllin e tij më 12 qershor në ceremoninë që do të zhvillohet në Hollywood Boulevard, duke u bërë pjesë e një liste emrash legjendarë që kanë lënë ndikim të jashtëzakonshëm në fushat e tyre.
Në këtë moment të veçantë nuk do të mungojë as Victoria Beckham. Bashkëshortja e tij, ish-anëtare e grupit të famshëm Spice Girls dhe sot një emër i njohur në industrinë e modës, do të mbajë një fjalim gjatë ceremonisë. Mes të ftuarve që do ta nderojnë Beckhamin do të jetë edhe aktori i njohur Tom Cruise, mik i afërt i familjes prej shumë vitesh.
Sipas organizatorëve të Hollywood Walk of Fame, ky vlerësim vjen në një moment simbolik, ndërsa Shtetet e Bashkuara po përgatiten për organizimin e Kupës së Botës FIFA.
Ana Martinez, producente e ceremonive të Walk of Fame, theksoi se kontributi i Beckhamit në rritjen e popullaritetit të futbollit në SHBA, si dhe ndikimi i tij në sport, argëtim dhe kulturën moderne, e bëjnë këtë nderim veçanërisht domethënës.
Ylli i Beckhamit do të jetë i 2,849-ti në Hollywood Walk of Fame. Ai do t’i bashkohet figurave të mëdha të sportit si Muhammad Ali dhe Billie Jean King, të cilët gjithashtu janë nderuar në kategorinë e argëtimit sportiv.
Ky moment shënon një tjetër arritje të rëndësishme për David Beckham, i cili vazhdon të mbetet një nga figurat më të njohura dhe me ndikim në botë, edhe shumë vite pas përfundimit të karrierës së tij si futbollist profesionist.
