Ministri i Jashtëm i Iranit, Abbas Araghchi, ka paralajmëruar për pasoja të rënda në rast të një sulmi ndaj Bejrutit, duke theksuar se një skenar i tillë mund të çojë në “rifillimin e plotë të luftës” në rajon.
Në një intervistë për median libaneze Al Mayadeen, Araghchi deklaroi se Teherani nuk do të qëndrojë pasiv përballë një përshkallëzimi të ri ushtarak.
“Çdo sulm ndaj Bejrutit do të ketë pasoja të rënda dhe do të çojë në rifillimin e plotë të luftës”, u shpreh ai, duke shtuar se forcat e armatosura iraniane janë vendosur në gatishmëri të plotë për një kundërpërgjigje, pas kërcënimeve izraelite ndaj periferive jugore të kryeqytetit libanez.
Deklaratat e tij vijnë në një moment tensionesh të larta në Liban, ku Izraeli ka zgjeruar operacionet ushtarake, ndërsa Hezbollah vazhdon sulmet me raketa në veri të Izraelit.
Konflikti u përshkallëzua ndjeshëm në muajt e fundit, duke shkaktuar mijëra viktima dhe një krizë të rëndë humanitare, me mbi një milion persona të zhvendosur nga shtëpitë e tyre.
Izraeli kishte paralajmëruar goditje të drejtpërdrejta ndaj periferive jugore të Bejrutit, një bastion i Hezbollahut, duke rritur frikën për një luftë më të gjerë rajonale.
