Pesë persona janë arrestuar pasi një jaht që transportonte shtatë persona drejt Mbretërisë së Bashkuar në mënyrë të paligjshme u ndalua pranë bregdetit jugor të Anglisë.
Operacioni u zhvillua mbrëmjen e së hënës, 25 maj, nga Agjencia Kombëtare kundër Krimit (NCA) dhe forcave kufitare britanike.
Dy anëtarë të ekuipazhit të jahtit, një britanik 42-vjeçar dhe një shtetas shqiptar 25-vjeçar u arrestuan.
Autoritetet identifikuan gjithashtu edhe tre persona të tjerë, të cilët dyshohet se po prisnin mjetin lundrues në breg. Mes tyre ishin një britanik 38-vjeçar dhe dy shqiptarë të moshave 24 dhe 32 vjeç. Edhe ata u arrestuan për dyshime lidhur me trafikimin e emigrantëve.
Pas marrjes në pyetje nga hetuesit e NCA-së, tre prej të arrestuarve u lanë të lirë me kusht, ndërsa dy shtetasit shqiptarë, 25 dhe 32 vjeç, vazhdojnë të mbahen në paraburgim për shkelje të ligjeve të emigracionit.
Shtatë personat e gjetur në jaht, të gjithë shtetas shqiptarë, do të trajtohen nga autoritetet britanike të emigracionit.
Komandanti i NCA-së, Saju Sasikumar, deklaroi se lufta kundër emigracionit mbetet një prioritet kryesor për autoritetet britanike.
