Ligji për huamarrje ka mbërritur në Kuvend. Edhe pse, pas euroobligacionit të ri, u kërkuan edhe 300 milionë euro shtesë për nevoja buxhetore, disa banka, mes të cilave nga Gjermania, Argjentina, SHBA-ja dhe Austria, janë dakorduar të japin 260 milionë euro. Bëhet fjalë për KfW Bank, Banco Bilbao Vizcaya Argentaria, S.A., Erste Group Bank AG, AKA Ausfuhrkredit-Gesellschaft mbH dhe Merrill Lynch International, përcjell PressOnline.al.
Plani është që mjetet të shfrytëzohen për nevoja buxhetore, si dhe për financimin e shpenzimeve kapitale. Afati për shlyerjen e kredisë është shtatë vjet, ndërsa periudha grejs është tre vjet.
Norma e interesit është variabile dhe përbëhet nga EURIBOR-i gjashtëmujor, i rritur me një marzh prej 2,10 për qind, përkatësisht rreth 4,4 për qind. Shteti çdo vit do t’i paguajë një kompensim prej 12.500 eurosh agjentit që ka qenë i përfshirë në këtë kredi, si dhe një provizion të njëhershëm prej 1,4 për qind të shumës së përgjithshme të kredisë për huadhënësit.
Në Ligjin për huamarrje thuhet gjithashtu se kredia do të shlyhet me para nga buxheti. Pasi dokumenti të kalojë filtrin kuvendor, duhet të nënshkruhet edhe marrëveshja për kredinë.
Më herët, Qeveria emetoi edhe dy euroobligacione në vlerë prej një miliard eurosh për shlyerjen e borxheve të vjetra që maturohen këtë vit. (PressOnline.al)
