Kapiteni i kombëtares së Francës, Kylian Mbappé, ka shkaktuar reagime të forta nga partia e ekstremit të djathtë të Marine Le Pen, pasi shprehu shqetësime për mundësinë e ardhjes së saj në pushtet në zgjedhjet presidenciale të vitit të ardhshëm.
27-vjeçari, i cili u rrit në periferi veriore të Parisit dhe ka origjinë algjeriane dhe kamerunase, deklaroi në një intervistë për “Vanity Fair”: “E di çfarë do të thotë dhe çfarë pasojash mund të ketë për vendin tim kur njerëz si ata vijnë në pushtet.”
Deklarata e tij shkaktoi menjëherë reagime nga Jordan Bardella, presidenti i partisë “National Rally”, i cili ironizoi sulmuesin duke iu referuar largimit të tij nga Paris Saint-Germain drejt Real Madridit dhe suksesit të mëvonshëm të klubit parisien në Champions League.
“E di çfarë ndodh kur Mbappé largohet nga PSG: klubi fiton Champions League!”, shkroi Bardella në rrjetet sociale.
Edhe Marine Le Pen reagoi duke thënë se nuk ishte problem që Mbappé nuk dëshiron fitoren e partisë së saj, duke shtuar se futbollistët nuk duhet të ndikojnë politikisht votuesit.
Ndërkohë, zyrtarë të partisë së saj theksuan se si kapiten i Francës, Mbappé duhet të përfaqësojë të gjithë qytetarët, përfshirë edhe votuesit dhe nuk duhet të shndërrohet në “aktivist politik”.
Debati mes palëve nuk është i ri, pasi gjatë zgjedhjeve të parakohshme parlamentare të vitit 2024, Mbappé kishte kritikuar rritjen e ekstremit të djathtë në Francë, duke e quajtur “katastrofike”, ndërsa Bardella e kishte akuzuar për shkëputje nga realiteti social i qytetarëve.
Vetë Mbappé, aktualisht lojtar i Real Madridit, ka theksuar më herët se futbollistët janë gjithashtu qytetarë dhe kanë të drejtë të shprehin mendimet e tyre për zhvillimet politike në vendin e tyre.
