Anthropic ka njoftuar një marrëveshje të re me SpaceX për të siguruar kapacitet të konsiderueshëm kompjuterik, në një lëvizje që synon të përballojë rritjen e shpejtë të kërkesës për shërbimet e Inteligjencës Artificiale. Sipas kompanisë, bashkëpunimi i jep akses në mbi 300 megavat kapacitet të ri llogaritës, që përfshin më shumë se 220 mijë GPU të Nvidia-s, duke rritur ndjeshëm infrastrukturën e saj teknologjike. Marrëveshja vjen në një moment kur Anthropic po përballet me kërkesë të lartë nga zhvilluesit dhe përdoruesit, çka ka sjellë kufizime në përdorim dhe ndryshime në modelin e tarifimit.
Në kuadër të këtyre ndryshimeve, kompania ka hequr kufizimet në orët me ngarkesë të lartë për shumicën e përdoruesve me pagesë, përfshirë abonimet Pro, Max, Team dhe Enterprise, si dhe ka rritur limitet e përdorimit për modelet kryesore. “Po bashkëpunojmë me SpaceX për të përdorur të gjithë kapacitetin e qendrës së tyre të të dhënave Colossus One”, deklaroi drejtuesja e produktit në Anthropic, Ami Vora.
Marrëveshja shihet si pjesë e një strategjie më të gjerë të SpaceX për t’u pozicionuar në industrinë e inteligjencës artificiale, ndërsa kompania po zgjeron aktivitetet përtej hapësirës dhe telekomunikacionit. Sipas deklaratave zyrtare, palët po eksplorojnë edhe mundësinë e zhvillimit të infrastrukturës së qendrave të të dhënave në orbitë, një koncept që do të çonte llogaritjen e avancuar të AI në hapësirë.
Në të njëjtën kohë, Anthropic po zgjeron bashkëpunimin edhe me Amazon për të rritur kapacitetin në Evropë dhe Azi, duke synuar përmbushjen e kërkesave të klientëve në tregje të rregulluara. Marrëveshja vjen në një moment kur gara globale për kapacitetin kompjuterik në AI po intensifikohet, me kompanitë kryesore që po investojnë në mënyrë agresive për të siguruar infrastrukturën e nevojshme për modelet e ardhshme të Inteligjencës Artificiale.
