George Clooney, i cili muajin e ardhshëm mbush 65 vjeç, ka zbuluar se po hyn në një fazë të re të jetës, ku setet e xhirimit nuk janë më prioriteti kryesor.
Aktori i njohur tha se dëshiron të ngadalësojë ritmin dhe t’i kushtojë më shumë kohë projekteve humanitare dhe çështjeve që kanë rëndësi të veçantë për të, sidomos atyre që drejton së bashku me bashkëshorten e tij, Amal Clooney.
Duke folur në mbrëmjen gala të 51-të të Çmimit Chaplin në Lincoln Center, Clooney u shpreh se në të ardhmen do të fokusohet më shumë te puna e Clooney Foundation for Justice, fondacioni që ai ka krijuar me Amal dhe që angazhohet për drejtësi dhe mbrojtjen e të drejtave të njeriut.
Ai tha gjithashtu se dëshiron të investojë kohë edhe në bashkëpunimin me “Roybal School of Film and Television” në Los Angeles, një shkollë që ndihmon të rinjtë nga komunitetet më pak të përfaqësuara të hyjnë në industrinë e filmit dhe televizionit.
Do të bëj gjëra që më përmbushin më shumë, sepse nuk po vrapoj më pas karrierës
-u shpreh Clooney.
Kjo është gjë e mirë, sepse të jep më shumë kohë për atë që ka rëndësi.
Megjithatë, aktori sqaroi se kjo nuk do të thotë largim nga Hollywood-i. Nëse do të vijë një rol që e tërheq vërtet, ai është gati ta pranojë.
Në të njëjtën mbrëmje, Clooney u nderua për kontributin e tij të jashtëzakonshëm në artin kinematografik, por pranoi se nuk ndihet rehat kur vendoset në qendër të vëmendjes.
Nga seriali “ER” deri te statusi si një nga yjet më të mëdhenj të Hollywood-it, George Clooney mbetet një emër ikonë, por tani duket se prioritetet e tij kanë ndryshuar.
