Nga partia maqedonase në opozitë, LSDM, njoftojnë se Ligji për Pagën Minimale i propozuar nga grupi i tyre parlamentar është futur në rend dite në Kuvendi i Maqedonisë së Veriut.
Sipas LSDM-së, propozimi për pagë minimale prej 600 eurosh është përgjigje konkrete ndaj kërkesave të sindikatave dhe punëtorëve për një jetë më dinjitoze.
“Tani që nuk po blihet aeroplan i ri për qeverinë, ka para për pagë minimale prej 600 eurosh. Për më tepër, grupi parlamentar i LSDM-së ka propozuar tashmë zëra specifikë buxhetorë nga të cilët mund të sigurohen fonde për të rritur pagën minimale. Kjo do të thotë – ka para, e tëra çfarë nevojitet është vullneti politik”, theksojnë nga LSDM, përcjell PressONline.al
Ata shtojnë se nuk ka më justifikime për mungesë fondesh dhe u bëjnë thirrje të gjithë deputetëve të mbështesin ligjin.
“Nuk ka më justifikim se nuk ka para. Të gjithë deputetët duhet ta mbështesin Ligjin dhe të votojnë për një pagë minimale prej 600 eurosh. Pa justifikime. Pa llogaritje. Është koha të hiqet luksi i qeverisë dhe që punëtorët të marrin pagat që meritojnë”, deklarojnë nga LSDM.
Nga ana tjetër, VMRO-DPMNE akuzon LSDM-në për mungesë konsistence, duke rikujtuar zhvillimet e vitit 2024.
Sipas VMRO-DPMNE-së, në vitin 2024 LSDM dhe BDI kishin propozuar ndryshime ligjore që do të ndryshonin metodologjinë e llogaritjes së pagave, duke përjashtuar pagën minimale nga formula për pagat e administratës.
“Kjo do të thoshte që rritjet e ardhshme të pagës minimale nuk do të ndikonin automatikisht në pagat e tjera në sektorin publik. Në këtë mënyrë, rritja lineare do të ndërpritej dhe mekanizmi mbrojtës për punëtorët do të dobësohej”, thuhet në reagimin e VMRO-DPMNE-së, përcjell PressOnline.al
Partia opozitare thekson se kishte paraqitur mbi 40 amendamente për të penguar miratimin e asaj zgjidhjeje dhe për të ruajtur parimin që paga minimale të mbetet pjesë e formulës së llogaritjes së pagave.
Debati për pagën minimale pritet të vazhdojë në Kuvend, ndërsa mbetet për t’u parë nëse do të ketë mbështetje të mjaftueshme politike për miratimin e propozimit për 600 euro.(PressOnline.al)



