Mollët përmbajnë fibra, antioksidantë dhe ndihmojnë në ruajtjen e tretjes së shëndetshme. Por, a ndryshon përfitimi i tyre në varësi të kohës kur i konsumojmë?
Dietologët japin përgjigje të sakta për momentin më të përshtatshëm të konsumimit të mollës, pasi ka periudha të ditës kur trupi përfiton më shumë nga ajo.
Molla në mëngjes ose gjatë mëngjesit
Fillimi i ditës me një mollë ofron një ushqim me pak kalori që ndihmon të ndiheni të ngopur për më gjatë, falë fibrave që përmban, shpjegon dr. Jaclyn A. Vernarelli, epidemiologe ushqimore dhe profesoreshë e asociuar në Universitetin “Sacred Heart”.
“Mollët janë ushqim praktik, me pak kalori, të pasura me fibra, vitamina dhe antioksidantë që përkrahin shëndetin e zemrës, zorrëve dhe sistemit imunitar. Ato janë gjithashtu burim i mirë i përbërjeve anti-inflamatore si vitamina C dhe kvercetina”, thekson Vernarelli.
Sipas dietologes Lauren Manaker, ngrënia e një molle të vetme nuk ndikon në mënyrë të theksuar në metabolizëm, por mund të ndihmojë në stimulimin e lehtë të zorrëve dhe rregullsinë e tretjes, transmeton Telegrafi.
Konsumimi i një molle një ose dy orë para ushqimit mund të ndihmojë në kontrollin e peshës trupore, pasi shton ndjesinë e ngopjes dhe ul marrjen e kalorive.
“Të hash mollë para ose gjatë vaktit ndihmon në shmangien e rritjeve të menjëhershme të sheqerit në gjak, sepse fibrat ngadalësojnë përthithjen e karbohidrateve”, shpjegon Morgan Walker, dietologe e regjistruar dhe profesoreshë e asociuar në “Lebanon Valley College”.
Përfshirja e mollës si pjesë e një vakti të balancuar ose si ndarje ndërmjet vakteve mban nivelin e energjisë të qëndrueshëm.
Molla para stërvitjes
Disa studime tregojnë se ngrënia e mollës para ushtrimeve mund të japë energji shtesë, megjithëse kjo varet nga organizmi dhe lloji i aktivitetit fizik.
Përveç sheqernave natyrale që ofrojnë energji, fibrat ruajnë stabilitetin e sheqerit në gjak – kështu shmanget ndjenja e lodhjes në mes të stërvitjes.
“Vetëm shmangni konsumimin e mollës menjëherë para ushtrimeve intensive nëse jeni të ndjeshëm ndaj fibrave”, shton Manaker.
Sipas dr. Ann VanBiber, profesoreshë e shkencës ushqimore dhe mjekësisë kulinare në Universitetin “Texas Christian”, përfshirja e mollës në çdo vakt është një ide e shkëlqyer.
“Molla shton ëmbëlsi natyrale dhe ndihmon ndjesinë e ngopjes. Në mëngjes mund të shtohet në tërshërë, petulla ose mafine”, sugjeron ajo.
Nëse pas darke ndieni nevojën për diçka të ëmbël, molla mund të jetë një alternativë e shëndetshme ndaj ëmbëlsirave. Walker rekomandon ta kombinoni me pak gjalpë nga arrat ose ta spërkatni me kanellë – fibrat ndihmojnë të shmangni ngrënien e tepërt gjatë natës.
“Gjithmonë them se koha më e mirë për të ngrënë mollë është pikërisht kur e hani”, thekson Walker.
Disa njerëz e preferojnë në mëngjes, të tjerë pasdite si ushqim të lehtë. Më e rëndësishme se koha është me çfarë e kombinoni: molla me gjalpë arrash ose fara ofron yndyra të shëndetshme dhe proteina që parandalojnë ngritjen e menjëhershme të sheqerit në gjak.
Dietologët theksojnë se është mirë të hahet me lëkurë, pasi aty gjendet sasia më e madhe e fibrave dhe antioksidantëve që ndihmojnë në ruajtjen e energjisë dhe metabolizmit të qëndrueshëm.
