Adriana Lima u shfaq në Madrid dhe mjaftuan disa fotografi për të rikthyer supermodelen në qendër të vëmendjes. Në moshën 45-vjeçare, ajo u shfaq me një pamje jashtëzakonisht të kuruar dhe fansat nisën menjëherë ta krahasojnë me imazhin e saj nga vitet e para të karrierës.
Lima mori pjesë më 18 shtator në festën përmbyllëse të Mercedes-Benz Fashion Week Madrid, të organizuar nga El Corte Inglés në Muzeun Kombëtar të Artit Reina Sofía. Ajo zgjodhi një fustan të zi elegant, flokët e mbledhur dhe një grim relativisht të thjeshtë.
Por ishte fytyra dhe pamja e saj e përgjithshme ajo që mori gjithë vëmendjen. Fotot nga eventi u përhapën me shpejtësi në rrjetet sociale, ku shumë përdorues e krahasuan Limën me versionin e saj të fillimit të viteve 2000.
Disa prej komenteve shkuan edhe më tej, duke pretenduar se modelja “nuk duket 45, por 25 vjeç”. Krahasimet me fotografitë e saj të vjetra u shfaqën në platforma të ndryshme, duke e kthyer paraqitjen e saj në një prej temave më të komentuara të modës gjatë ditëve të fundit.
Ndryshimi në pamjen e saj është vënë re edhe nga mediat ndërkombëtare. Vogue Arabia e përshkroi paraqitjen e re si një version më të skalitur të modeles, duke vënë në dukje vetullat e ngritura, nofullën më të theksuar dhe pamjen më të tonifikuar.
Megjithatë, komentet online kanë hapur edhe diskutime rreth mënyrës se si mund të jetë arritur ky ndryshim. Disa profesionistë të estetikës të cituar nga Vogue Arabia kanë spekuluar për procedura të mundshme, përfshirë filler-at ose ndërhyrje të tjera estetike, por Adriana Lima nuk ka konfirmuar se ka kryer ndonjë prej tyre.
Vetë modelja ka folur edhe më herët për presionin që vjen nga komentet mbi pamjen e saj. Pas paraqitjes së saj në premierën e The Hunger Games në vitin 2023, kur disa persona komentuan ndryshimin e fytyrës së saj, Lima publikoi një selfie pa grim dhe shpjegoi se në atë periudhë ishte nënë e tre fëmijëve dhe kishte prioritete të tjera.
Jam fytyra e një nëne të lodhur
-ishte mesazhi që ajo kishte përcjellë në atë kohë, duke iu përgjigjur komenteve mbi pamjen e saj.
Ndër vite, Lima ka folur gjithashtu për rëndësinë e aktivitetit fizik dhe kujdesit ndaj vetes. Pas lindjes së fëmijës së saj të tretë, ajo është raportuar se ka kombinuar stërvitjen me pesha, kardion dhe aktivitete të tjera fizike.
Paraqitja në Madrid vjen në një moment interesant për supermodelen, e cila vazhdon të jetë aktive në industrinë e modës edhe pas më shumë se dy dekadash në skenën ndërkombëtare. Në fillim të këtij viti, ajo ishte pjesë e fushatës së pranverës 2026 të Donna Karan New York, së bashku me Joan Smalls dhe Grace Elizabeth.
Ndërkohë, Lima pritet të rikthehet sërish në pasarelën e Victoria’s Secret, duke e bërë paraqitjen e saj në Madrid edhe më të komentuar.
Në një industri ku pamja ndryshon vazhdimisht dhe mosha shpesh bëhet temë diskutimi, Adriana Lima vazhdon të tërheqë vëmendjen sa herë shfaqet. Këtë herë, një fustan i zi, flokë të mbledhur dhe një pamje e freskët mjaftuan që fansat të thoshin të njëjtën gjë:
Sikur u kthye pas në kohë.
