Kryeministri Hristijan Mickoski pret që rritja reale e BPV-së këtë vit të jetë ndërmjet 3,5 dhe 4 për qind. Ai tha se huamarrjet e Qeverisë gjatë kësaj periudhe janë të destinuara për shlyerjen e borxheve të vjetra dhe financimin e investimeve kapitale. Sipas tij, vendi ka një nga normat më të ulëta të inflacionit në Evropë, ndërsa rritja e BPV-së dhe e prodhimit industrial paraqet një tregues pozitiv për ekonominë.
“ Të gjitha huamarrjet janë për projekte si ky, për shlyerjen e borxheve të vjetra, euroobligacionet. Këtë vit kemi një euroobligacion prej 700 milionë, vitin e ardhshëm prej 500 milionë, në vitin 2028 përsëri 700 milionë, kemi interesa dhe deficit buxhetor për realizimin e investimeve kapitale dhe këto janë shpenzime rrjedhëse. Por e rëndësishme është se kemi një nga normat më të ulëta të inflacionit në Evropë, rritje të BPV-së, të prodhimit industrial, të cilën dje e publikoi Enti Shtetëror i Statistikave, dhe kjo është një nga shembujt e rrallë në Evropë”, u shpreh Mickoski.
Mickoski rikujtoi se ekonomia e Maqedonisë së Veriut u rrit me 3 për qind në vitin 2024 dhe me 3,5 për qind në vitin 2025. Sipas tij, Qeveria pret që rritja reale e BPV-së të vazhdojë edhe këtë vit dhe deri në fund të vitit të arrijë ndërmjet 3,5 dhe 4 për qind, ndërsa rritja nominale të jetë rreth 8 për qind.
“Kjo Qeveri u zgjodh më 23 qershor 2024 dhe vitin 2024 e përfunduam me një rritje reale të BPV-së prej 3 për qind, ndërsa rritja nominale ishte afërsisht dy herë e gjysmë më e madhe, rreth 7 për qind, dhe ishim në gjysmën e sipërme të vendeve të Evropës. Vitin e kaluar, 2025, e përfunduam me një rritje të PBB-së prej 3,5 për qind, ndërsa rritja nominale ishte mbi 8 për qind dhe ishim ndër 5-6 vendet e para në Evropë. Këtë vit planifikojmë që deri në fund të vitit rritja e PBB-së të jetë ndërmjet 3,5 dhe 4 për qind, që do të thotë se kjo rritje e vazhdueshme reale e PBB-së të vazhdojë, ndërsa rritja nominale të jetë rreth 8 për qind”, theksoi Mickoski.
Kryeministri Hristijan Mickoski theksoi se rritja prej 3.4 për qind e prodhimit industrial në tremujorin e dytë është tregues se gjendja ekonomike në vend është stabilizuar. Ai theksoi se kjo është veçanërisht e rëndësishme në kushtet kur ekonomia evropiane po rritet me më pak se 1 për qind në vit, ndërsa Bashkimi Evropian mbetet partneri më i madh tregtar i vendit.
