Presidenti amerikan Donald Trump ka nënshkruar një urdhër ekzekutiv për ndryshimin e emrit të Liqenit Ontario, duke e quajtur në Shtetet e Bashkuara “Lake America” (Liqeni i Amerikës). Urdhri i drejton Departamentit të Brendshëm amerikan që të përditësojë emërtimin në regjistrin zyrtar të emrave gjeografikë.
Megjithatë, vendimi i Trump nuk mund ta detyrojë Kanadanë të përdorë emrin e ri, pasi Liqeni Ontario shtrihet në kufirin mes SHBA-së dhe Kanadasë. Kryeministri kanadez Mark Carney e ka kundërshtuar nismën, duke theksuar se emri “Ontario” i paraprin si krijimit të Kanadasë, ashtu edhe Deklaratës së Pavarësisë së SHBA-së.
Ndryshimi i emrit vjen në një moment tensionesh të forta mes dy vendeve, pas përshkallëzimit të luftës tregtare. SHBA ka vendosur tarifa 50% për rreth 20 miliardë dollarë mallra kanadeze, ndërsa Kanadaja është kundërpërgjigjur me tarifa ndaj produkteve amerikane, përfshirë çelikun, produktet e qumështit dhe pajisjet bujqësore.
Liqeni Ontario është një nga pesë Liqenet e Mëdha të Amerikës së Veriut. Trump, i cili vitin e kaluar shtyu edhe ndryshimin e emrit të Gjirit të Meksikës në “Gjiri i Amerikës”, la të kuptohet se kjo fushatë mund të vazhdojë, duke thënë me shaka se tani mund të jetë radha e Oqeanit Atlantik ose Paqësorit.
/vizionplus.tv
