Gjithsej 43 raste me ethe të Nilit Perëndimor janë regjistruar deri tani në vend – bëri të ditur sot në një konferencë për media ministri i Shëndetësisë, Sasho Klekovski. Sipas ministrit, 40 prej tyre janë konfirmuar përfundimisht, ndërsa tre raste janë konfirmuar me një test.
Rastet e para janë evidentuar në komunat e Shkupit, Qendër dhe Çair.
“Që nga konferenca e fundit për media e deri më tani janë regjistruar dy raste të reja në Qendër, një në Çair dhe një në Aerodrom, në kufi me pjesën rurale. Pasqyra klinike është standarde dhe nuk ka ndryshime në këtë aspekt”, deklaroi Klekovski në konferencën e sotme.
Në kuadër të monitorimit të shpendëve, ministri bëri të ditur se është identifikuar shpendi i parë i ngordhur me virusin e Nilit Perëndimor. Bëhet fjalë për një korb që është gjetur në Shkup.
“Shpendët e ngordhur mblidhen nga Agjencia e Ushqimit dhe Veterinarisë (AUV), pas së cilës bëhet identifikimi i mëtejshëm i zonave me rrezik nga ethet e Nilit Perëndimor”, tha Klekovski, duke falënderuar qytetarët që raportojnë rastet e shpendëve të ngordhur.
Para konferencës së sotme, Klekovski tha se kishte zhvilluar një takim me kryetarët e komunave të Shkupit dhe të Rajonit të Shkupit për identifikimin e zonave me rrezik të lartë për ethet e Nilit Perëndimor.
Qëllimi i takimit, sipas tij, është identifikimi i këtyre zonave, pasi mushkonjat nuk njohin kufijtë administrativë të komunave.
“Në disa komuna, për shembull në Sopishtë, nuk ka zona me rrezik të lartë, por ka raste. Në Çuçer Sandevë nuk ka zona me rrezik të lartë, por ka në kufi me Butelin dhe jemi përpjekur t’i identifikojmë. Aktualisht po punojmë me 34 zona me rrezik, prej të cilave 13 janë me rrezik të lartë. Kjo është e dukshme edhe në imazhet satelitore”, deklaroi ministri.
Ekzistojnë dy kritere kryesore për përcaktimin e rrezikut të një lokacioni: uji i ndenjur dhe niveli i lartë i lëndës organike. Në thelb, sipas Klekovskit, duhet të ketë ujë të ndenjur dhe mbetje organike në të.
Shembuj të zonave me rrezik të lartë janë kanalet e ujitjes në Fushën e Shkupit ose pjesët “e vdekura” të lumenjve.
“Serava është pjesë e problemit në Haraçinë dhe Butel, kanalet në Jurumleri, Stajkovc dhe Singeliq në Gazi Babë, kanali kryesor në Ilinden në Fushën e Shkupit, kanalet në Draçevë, kanalet në Batincë dhe Studeniçan. Ajo që kemi identifikuar janë edhe disa lloje të tjera lokacionesh me rrezik të lartë, të cilat më parë nuk ishin marrë parasysh. Bëhet fjalë për gropat septike. Rrugët dhe vendbanimet me një numër të madh gropash septike hyjnë në kategorinë e rrezikut të lartë”, tha ministri.
Sipas tij, në këtë kategori hyjnë edhe varrezat, për shkak të ujit të ndenjur në vazot e luleve dhe pranisë së lëndës organike, si dhe deponitë e gomave të vjetra. Nëse ato nuk ruhen siç duhet, gomat janë vende ideale për shumimin dhe qëndrimin e mushkonjave.
Një pjesë edhe më e madhe e rrezikut, sipas Klekovskit, vjen nga gjëra të vogla ose të padukshme, si hidrantët e prishur, vazot e luleve që mbahen jashtë, fuçitë e vjetra me ujë shiu dhe, në përgjithësi, uji i ndenjur.
Rrezik të caktuar mund të paraqesin edhe çezmat publike të dëmtuara, por edhe ujitja e parqeve, nëse nuk kryhet siç duhet.
Klekovski siguroi se spërkatja kundër mushkonjave kryhet me preparate të rekomanduara nga Organizata Botërore e Shëndetësisë (OBSH) dhe se ato nuk paraqesin rrezik për shëndetin e njerëzve.
