Nëse vendimi i Gjykatës Kushtetuese për reklamimin politik me pagesë do të jetë në favor të së Majtës, me iniciativën e së cilës Gjykata tashmë ka shqyrtuar këtë çështje, atëherë Kuvendi do të duhet ta rihapë sërish Kodin Zgjedhor, të paktën në këtë pjesë. Kjo do të krijonte mundësi që partitë të përpiqen të arrijnë konsensus edhe për çështjet për të cilat kanë ngecur, shkruan PressOnline.al
Vendimi i Gjykatës Kushtetuese për reklamimin politik me pagesë, por edhe ministri i ri i Drejtësisë, Jeton Shasivari, mund ta rikthejnë Kodin Zgjedhor lart në agjendën politike pas pushimeve verore, pasi zgjidhja ligjore ka ngecur në Kuvend, vlerësojnë partitë.
Zgjidhja ligjore mbeti e bllokuar në labirintet parlamentare pasi LSDM-ja e mbuloi atë me 10.000 amendamente, ndërsa VMRO-DPMNE-ja e ka përcaktuar votimin e diasporës si vijë të kuqe nga e cila nuk do të tërhiqet. Për të gjitha dallimet e tjera mes partive, topin ia ka kaluar opozitës – ajo duhet të merret vesh mes vete dhe gjithçka që do të dakordojnë, VMRO-DPMNE-ja do ta pranojë.
Nëse vendimi i Gjykatës Kushtetuese për reklamimin politik me pagesë do të jetë në favor të së Majtës, me iniciativën e së cilës Gjykata tashmë ka shqyrtuar këtë çështje, atëherë Kuvendi do të duhet ta rihapë sërish Kodin Zgjedhor, të paktën në këtë pjesë. Kjo do të krijonte mundësi që partitë të përpiqen të arrijnë konsensus edhe për çështjet për të cilat kanë ngecur.
Edhe pse, përveç rekomandimeve të OSBE-së dhe ODIHR-it për legjislacionin zgjedhor, nxitës për diskutimin mbi Kodin Zgjedhor ishte edhe ndryshimi i modelit zgjedhor, megjithatë pushteti dhe opozita nuk arritën marrëveshje për futjen e një njësie zgjedhore në vend të gjashtë njësive.
LSDM-ja u tërhoq nga grupi i punës pasi VMRO-DPMNE-ja, pa konsensus, e shfuqizoi qeverinë teknike, pas së cilës partia opozitare e bllokoi ligjin me mijëra amendamente. Kodi Zgjedhor është një nga pesë ligjet për të cilat mund të zbatohet filibusteringu, përkatësisht lejohet debat i pakufizuar.
Gjykata Kushtetuese do ta vendosë Kodin Zgjedhor në rend dite në seancën e parë të shtatorit
Siç kemi raportuar tashmë, Gjykata Kushtetuese në seancën e parë të shtatorit do t’i vendosë në votim të gjitha lëndët për të cilat nuk ka vendime, me përjashtim të atyre të ndjeshme. Bëhet fjalë për gjashtë ose shtatë lëndë, ndër të cilat edhe Kodi Zgjedhor në pjesën që ka të bëjë me reklamimin politik me pagesë.
Gjykata do të votojë për këto lëndë, pasi me zgjedhjen e gjyqtares Meri Dika Georgievska si gjyqtare kushtetuese do të ketë ndryshim të situatës. Herën e kaluar nuk kishte shumicën prej të paktën pesë gjyqtarësh për të marrë çfarëdo vendimi.
Mundësia e dytë është që ministri i ri i Drejtësisë, Shasivari, ta rinovojë ose të formojë një grup të ri pune për Kodin Zgjedhor, pasi ai është pjesë e agjendës së reformave dhe e vetmja pikë që Qeveria nuk arriti ta përmbyllë as gjatë periudhës së tolerancës deri më 15 korrik.
Nga VMRO-DPMNE-ja bëjnë të ditur se tani gjithçka varet nga LSDM-ja dhe ministri i ri i Drejtësisë.
“Pyetja është nëse LSDM-ja do të ishte e gatshme të diskutojë për një zgjidhje të përbashkët dhe për tërheqjen e amendamenteve, pasi Propozim-ligji është i përgatitur në pjesën më të madhe, me elementet kryesore të ODIHR-it. Dhe nëse ministri i ri i Drejtësisë do ta hapte sërish këtë temë si një çështje të rëndësishme. Do të ishte e dëshirueshme që fillimisht ai të gjente një mënyrë për të biseduar me liderin e LSDM-së, Venko Filipçen, për të vlerësuar nëse do të kishte kuptim që kjo çështje të rihapej dhe të investohej sërish kohë dhe pritshmëri”, thotë për „Slloboden Peçat“ një zyrtar i lartë i VMRO-DPMNE-së, përcjell PressOnline.al
Ai shton se partia nuk ka problem me iniciativën e së Majtës, për të cilën duhet të vendosë Gjykata Kushtetuese.
“Gjithçka që do të dakordohej bashkërisht me BDI-në, të Majtën dhe LSDM-në, për ne do të ishte një model i pranueshëm për Kodin Zgjedhor”, thonë nga VMRO-DPMNE.
Nga ministri i Drejtësisë nuk morëm përgjigje se cilat janë planet për Kodin Zgjedhor.
E Majta kërkon reforma thelbësore
Nga E Majta, ndërkaq, theksuan se edhe pse është humbur afati nga agjenda e reformave, procesi për miratimin e një Kodi të ri Zgjedhor nuk duhet të ndalet, pasi Maqedonia ka nevojë për reforma thelbësore zgjedhore që do të sigurojnë një model zgjedhor më të drejtë dhe më demokratik.
“Nevoja për të pasur zgjedhje në përputhje me rekomandimet e OSBE/ODIHR-it dhe standardet ndërkombëtare nuk ka përfunduar. Kjo çështje nuk mund të konsiderohet e mbyllur”, deklaroi deputeti Amar Mecinoviq në një paraqitje në televizionin Sitel, përcjell PressOnline.al
Sipas tij, nevojiten ndryshime thelbësore në Kodin Zgjedhor për të pasur një model zgjedhor më përfaqësues, i cili do të pasqyrojë siç duhet vullnetin e qytetarëve. Ai thekson se një njësi zgjedhore duhet të mbetet çështje qendrore në çdo diskutim të ardhshëm për reformat zgjedhore.
“Më vjen keq që kryeministri zgjodhi diasporën si vijë të kuqe. Unë mendoj se ai duhej të qëndronte pas një njësie zgjedhore. Ky ishte premtimi me të cilin e fituan besimin e qytetarëve”, tha Mecinoviq.
Sipas tij, nëse nuk vazhdohet me reformat zgjedhore, shteti rrezikon që edhe në ciklet e ardhshme zgjedhore të përballet me kushte të pabarabarta për garën politike. Ai u bëri thirrje partive parlamentare që të mos lejojnë që reformat zgjedhore të mbeten një proces i papërfunduar dhe që sërish të hapin bisedimet për një Kod të ri Zgjedhor.
“I bëj thirrje VMRO-DPMNE-së, për ta kujtuar se ka kohë. I bëj thirrje kryeministrit Hristijan Mickoski që të dalë nga interesat e ngushta partiake, të tregojë kapacitet shtetëror dhe të respektohen të gjitha votat në mënyrë të barabartë”, porositi Mecinoviq.
Sipas burimeve partiake, për momentin nuk ka ndryshim në qëndrimet e VMRO-DPMNE-së dhe LSDM-së për ndryshimin e Kodit Zgjedhor, ndërsa as ministri Shasivari nuk i ka kontaktuar partitë për legjislacionin zgjedhor.
