Madrid është kthyer në qendrën e festimeve kombëtare pas triumfit të Spanjës në Kupën e Botës. Një ditë pas shpalljes kampione të botës, kombëtarja spanjolle ka nisur ceremoninë zyrtare të pritjeve institucionale, përpara festës së madhe me tifozët në kryeqytet.
Skuadra spanjolle mbërriti në Madrid në orën 14:25, në aeroportin Adolfo Suárez Madrid-Barajas, pas kthimit nga Nju Jorku. Kapiteni Rodrigo Hernández ishte ai që zbriti nga avioni trofeun e artë të Kupës së Botës, duke udhëhequr delegacionin kampion.
Pjesëtarët e kombëtares u pritën fillimisht në Pallatin Mbretëror të Zarzuelës nga familja mbretërore spanjolle. Kapiteni Rodri dhe trajneri Luis de la Fuente kryesuan delegacionin, së bashku me presidentin e Federatës Spanjolle të Futbollit, Rafael Louzán.
Lojtarët kaluan përmes një pritjeje zyrtare ku përshëndetën Mbretin Felipe VI, Princeshën Leonor dhe Infanten Sofía, të cilat u shfaqën me fanellën e kombëtares spanjolle. Një nga momentet më të veçanta ishte përshëndetja mes Mbretit dhe yllit të ri të skuadrës, Lamine Yamal, me të dy që shkëmbyen një përqafim të ngrohtë.
Pas përshëndetjeve zyrtare, skuadra bëri fotografinë familjare në kopshtin e Pallatit të Zarzuelës, me Kupën e Botës në qendër të imazhit. Presidenti i Federatës i dorëzoi gjithashtu Mbretit një fanellë të kombëtares.
Në fjalimin e tij, Mbreti Felipe VI vlerësoi sakrificën dhe paraqitjen e ekipit gjatë turneut. Ai u shpreh se triumfi ishte një moment historik për futbollin spanjoll dhe falënderoi lojtarët për emocionet që i kanë dhuruar vendit.
“E gjithë Spanja ju falënderon. Ka qenë një privilegj t’ju shihnim të luanit dhe të fitonit Kupën. Jeni një grup i jashtëzakonshëm për historinë e futbollit spanjoll”, ishte mesazhi i Mbretit për kampionët.
Pas ceremonisë në Zarzuela, autobusat me lojtarët dhe stafin teknik u nisën drejt Pallatit të Moncloas, ku i priti kryeministri Pedro Sánchez.
Sánchez zhvilloi një pritje zyrtare për secilin prej futbollistëve, duke i përshëndetur një nga një me shtrëngim duarsh. Përshëndetja me Borja Iglesias ishte ndër më emocionueset.
Në Moncloa, lojtarët mbërritën të udhëhequr sërish nga Rodri dhe De la Fuente. Ndërkohë, Lamine Yamal dhe Nico Williams u shfaqën së bashku, si dy prej figurave më të spikatura të kësaj skuadre kampione.
Pas angazhimeve institucionale, festa do të zhvendoset në rrugët e Madridit. Kombëtarja do të zhvillojë një paradë me autobus të hapur në disa prej pikave më simbolike të kryeqytetit, përpara se gjithçka të kulmojë në sheshin Cibeles.
Mbi 60 mijë tifozë pritet të mbushin sheshin për ceremoninë kryesore, ku janë programuar fjalime dhe aktivitete muzikore. Atmosfera në Madrid ka nisur të ndizet që herët, ndërsa Cibeles është mbushur gradualisht me tifozë pavarësisht temperaturave të larta, që kanë arritur rreth 35 gradë.
Lojtarët spanjollë u shfaqën në ceremonitë zyrtare me kostume elegante të markës Loewe, partner zyrtar i kombëtares deri në vitin 2030. Kostumet kanë një vlerë të raportuar prej rreth 3300 eurosh dhe një detaj i veçantë ishte se të gjithë lojtarët mbanin të përveshur vetëm mëngën e majtë.
Festimet e sotme vijnë pas një nate të gjatë gëzimi në stadiumin MetLife në Nju Xhersi, ku lojtarët vazhduan festën edhe në dhomat e zhveshjes së bashku me familjarët e tyre pas triumfit historik.
Spanja rikthehet kështu në majën e futbollit botëror dhe Madridi po përjeton një nga festimet më të mëdha sportive të viteve të fundit.
