Të paktën një person humbi jetën dhe shtatë të tjerë u plagosën si pasojë e sulmeve me raketa që Rusia kreu në orët e para të mëngjesit ndaj kryeqytetit ukrainas, Kievit, njoftuan autoritetet ushtarake dhe civile të Ukrainës.
Sipas Forcave Ajrore të Ukrainës dhe administratës ushtarake të qytetit, alarmet për sulme ajrore nisën rreth orës 01:20 (me orën e Greqisë), ndërsa raketat goditën disa zona të kryeqytetit.
Kryetari i Bashkisë së Kievit, Vitali Klitschko, bëri të ditur përmes Telegramit se nga sulmet shpërthyen zjarre në një konvikt, një pallat banimi dhe një supermarket. Ai tha se të paktën pesë lagje të qytetit u goditën, ndërsa dëme u regjistruan edhe në ndërtesa të tjera dhe depo.
Rusia vazhdon të kryejë sulme me raketa dhe dronë me rreze të gjatë veprimi ndaj Kievit pothuajse çdo ditë që nga fillimi i pushtimit të Ukrainës në shkurt të vitit 2022.
Sulmet e fundit ruse erdhën një ditë pasi Ukraina kreu një sulm me dronë ndaj dy depove të kompanive ruse të logjistikës, ku sipas raportimeve humbën jetën të paktën tetë persona.
