Gazetari dhe analisti Destan Jonuzi vlerëson se rindërtimi i Qeverisë paraqet një moment të rëndësishëm politik, por thekson se suksesi i tij nuk do të matet me numrin e ministrave të rinj, por me rezultatet konkrete që do të prodhojnë institucionet.
Në një intervistë për Faktor.mk, Jonuzi deklaron se regjistrimi i VLEN-it si një subjekt i vetëm politik shënon një fazë të re të konsolidimit politik, duke i dhënë kësaj force një pozitë më të qartë në marrëdhëniet me partnerët e koalicionit qeverisës.
Sipas tij, ky zhvillim nuk përbën vetëm një akt administrativ, por një proces që rrit edhe përgjegjësinë politike të VLEN-it.
“Rindërtimi i Qeverisë do të jetë testi i parë serioz për strukturën e re të VLEN-it. Për herë të parë opinioni nuk do ta vlerësojë si një koalicion partish, por si një subjekt të vetëm politik. Kjo do të thotë se si sukseset, ashtu edhe dështimet eventuale do të reflektohen drejtpërdrejt mbi kredibilitetin e partisë”, thekson Jonuzi.
Lidhur me motivet e rindërtimit qeveritar, ai vlerëson se procese të tilla zakonisht kanë një dimension të dyfishtë.
“Në politikë rrallëherë ekziston vetëm një arsye për rindërtimin e një qeverie. Nga njëra anë synohet përmirësimi i funksionimit të institucioneve, ndërsa nga ana tjetër dërgohet një mesazh politik se shumica qeverisëse është e gatshme të reagojë kur vlerëson se ka hapësirë për rezultate më të mira”, shprehet ai.
Jonuzi shton se ndryshimet kadrovike mund të kenë efekt pozitiv vetëm nëse shoqërohen me reforma reale dhe politika më efikase.
Duke folur për sfidat me të cilat është përballur VLEN-i, ai thekson se periudha e kaluar ka qenë një proces transformimi nga koalicion parazgjedhor në një parti të vetme politike.
Sipas tij, mosmarrëveshjet publike ndërmjet disa funksionarëve ndikuan negativisht në perceptimin e opinionit, por krijimi i një strukture të unifikuar organizative mund të sjellë më shumë disiplinë, koordinim dhe efikasitet në vendimmarrje.
Në intervistë, Jonuzi ndalet edhe te marrja e Ministrisë së Drejtësisë nga VLEN-i, duke e cilësuar atë si një nga dikasteret më të ndjeshme të çdo qeverie.
Ai vlerëson se ky resor përfaqëson më shumë përgjegjësi sesa përfitim politik dhe se do të jetë testi më i rëndësishëm për aftësinë e VLEN-it për të realizuar reforma konkrete në drejtësi dhe në luftën kundër korrupsionit dhe krimit të organizuar.
“Publiku nuk pret zgjidhje të shpejta, por hapa të qartë, qëndrueshmëri dhe vullnet politik për zbatimin e reformave. Kritikat nëse VLEN është apo jo vetëm ‘dekor’ në Qeveri nuk mund të rrëzohen me deklarata politike, por vetëm me rezultate konkrete”, thekson Jonuzi.
Në fund, ai nënvizon se vetëm ndryshimi i ministrave nuk mjafton për të përshpejtuar zhvillimin ekonomik, reformat institucionale dhe integrimin evropian të vendit.
“Rindërtimi mund të jetë fillimi i një impulsi të ri politik vetëm nëse pasohet nga një mënyrë më efikase e qeverisjes, institucione funksionale dhe prioritete të qarta. Në fund, çdo qeveri gjykohet nga ajo që ka realizuar, e jo nga numri i funksionarëve që ka zëvendësuar”, përfundon gazetari dhe analisti Destan Jonuzi në intervistën e tij për Faktor.mk.
Intervista e plotë: https://faktor.mk/dali-vlen-so-resorot-pravda-kje-dokaze-deka-ne-e-dekor-vo-kabinetot-na-mickoski—analiza-so-jonuzi?


