Për të 35-të ditën radhazi, mijëra qytetarë u grumbulluan këtë të shtunë në Sheshin Skënderbej për të vijuar më pas marshimin drejt godinës së kryeministrisë.
Për herë të dytë brenda një muaj pjesë e protestës është bërë dhe diaspora shqiptare. Në protestën të cilën e cilësuan kombëtare, u panë flamuj të shumtë kombëtar si edhe ata të SHBA-së.
Protesta u shoqërua fillimisht me disa akte simbolike përpara Kryeministrisë. Protestuesit vendosën një arkivol me mbishkrimin “Arkivoli politik i Ramës”, i shoqëruar nga pankarta me të njëjtin mesazh. Po ashtu, u ekspozua edhe një tortë prej betoni me mbishkrimin “Rama edhe 100 vite në burg”.
Protestuesit sollën në bulevard edhe një bust që, sipas tyre, përfaqësonte kryeministrin Edi Rama. Mbi të ishte vendosur mbishkrimi “Busti i fundit i diktaturës” i cili u rrëzua mes brohoritjeve dhe duartrokitjeve të mijëra pjesëmarrësve.
Sipas organizatorëve, ky veprim ishte një referencë simbolike ndaj rrëzimit të bustit të diktatorit Enver Hoxha, duke e paraqitur si shenjë të përfundimit të asaj që ata e konsiderojnë një epokë politike.
Tubimi, që organizatorët e cilësojnë si më masivin që prej nisjes së lëvizjes qytetare 35 ditë më pare u zhvillua edhe në mbështetje të protestuesve të arrestuar pas përplasjeve me policinë.
