Sporti shqiptar është në zi pas ndarjes së parakohshme nga jeta të ish-basketbollistit dhe trajnerit të njohur, Fatjon Taraboshi.
Në moshën 39-vjeçare, ai mbylli sytë pas një beteje të vështirë me problemet shëndetësore që e kishin shoqëruar gjatë muajve të fundit. Taraboshi kishte kaluar një periudhë të vështirë, duke iu nënshtruar edhe një ndërhyrjeje delikate kirurgjikale në Itali.
Për të mbështetur trajtimin e tij, familjarë, miq dhe dashamirës të sportit organizuan një fushatë solidariteti për të ndihmuar në përballimin e shpenzimeve mjekësore. I konsideruar si një nga emrat e spikatur të basketbollit shkodran, Fatjon Taraboshi la gjurmë të rëndësishme me fanellën e Vllaznisë, ku arriti të shpallej kampion.
Pas përfundimit të karrierës si lojtar, ai vijoi kontributin e tij në sport edhe në rolin e trajnerit, duke ndarë përvojën dhe pasionin me brezat e rinj. Vetëm pak javë më parë, ai ishte nderuar publikisht për kontributin e vyer të dhënë ndër vite në basketbollin e Shkodrës. Ndarja e tij nga jeta lë një boshllëk të madh në komunitetin sportiv dhe tek të gjithë ata që e njohën dhe e vlerësuan si sportist e njeri.
