Bebe Rexha po hap një kapitull të ri në jetën dhe karrierën e saj, duke lënë pas kufizimet e industrisë muzikore dhe duke marrë kontrollin e plotë të rrugëtimit të saj artistik.
Në një intervistë të sinqertë për revistën People, këngëtarja me origjinë shqiptare tregoi se largimi nga kompania e saj diskografike afatgjatë në vitin 2025 i dha mundësinë të rikthehej tek vetja dhe të rifitonte lirinë krijuese që kishte humbur ndër vite.
Pas vitesh duke u ndier sikur nuk kisha asnjë fuqi, ishte shumë e vështirë të lidhesha me ndjenjat e mia të vërteta. Në një farë mënyre, isha mpirë emocionalisht
-u shpreh artistja 36-vjeçare.
Sipas saj, marrëveshja e mëparshme diskografike kishte kufizuar kreativitetin e saj dhe e kishte bërë të ndiente se kishte humbur disa nga vitet më të vlefshme të jetës.
Mendoj se valuta më e çmuar në jetë është koha. Por duhet të vazhdosh përpara
-tha ajo.
Kjo frymë lirie reflektohet edhe në albumin e saj të ri “Dirty Blonde”, i publikuar më 12 qershor. Projekti përfaqëson një rikthim te rrënjët dance-pop të këngëtares, por njëkohësisht sjell këngë më personale dhe emocionale se kurrë më parë.
U ndjeva e lirë. Nuk më pëlqen të futem në një kuti
-tha Rexha për procesin e krijimit të albumit me 13 këngë.
Një nga kantautoret më të suksesshme të industrisë, Rexha ka shkruar hite për emra të mëdhenj si Eminem dhe Rihanna, përfshirë superhitin “The Monster”. Megjithatë, ajo pranon se për vite me radhë ka luftuar me ndjesinë se nuk përshtatej me modelin tradicional të një ylli pop.
Gjithmonë ndihesha sikur nuk përputhesha me atë që pritej nga një yll i muzikës pop
-tha ajo.
E lindur dhe e rritur në Staten Island nga prindër shqiptarë, Rexha u ndikua që në fëmijëri nga stile të ndryshme muzikore, gjë që shpjegon larmishmërinë e saj artistike. Në albumin e ri ajo kombinon elemente dance, pop, country dhe balada emocionale, duke reflektuar eksperiencat e saj personale dhe profesionale.
Artistja nuk ka hezituar asnjëherë të flasë hapur për pasiguritë, shëndetin mendor dhe imazhin trupor. Ajo pranon se ka kaluar periudha të vështira, por sot ndihet më e fortë dhe më e lumtur.
Kam qenë më e dobët, më e shëndoshë dhe gjithçka në mes. Gjëja më e rëndësishme për mua nuk është vetëm të dukem mirë, por të ndihem mirë
Rexha zbuloi gjithashtu se para se të vendoste të bëhej artiste e pavarur, kishte zhvilluar takime me disa kompani të mëdha diskografike, por ishte refuzuar për arsye që i konsideron absurde.
Më thanë se isha shumë e vjetër. Mund të isha dorëzuar shumë lehtë, por gjëja për të cilën jam më krenare është se nuk u dorëzova kurrë
-përfundoi këngëtarja.
Sot, Bebe Rexha e sheh suksesin e saj jo vetëm si triumf artistik, por edhe si dëshmi të forcës, këmbënguljes dhe vendosmërisë për të mos lejuar askënd t’i përcaktojë kufijtë.
